Petra Kvitova chuan 2025 season tawp rualin tennis khelh a chawlhsan tur thu a puang.
Czech tennis player Kvitova hi kum 2011 leh 2014-ah khan Wimbledon champion a ni a, kum 2019 Australian Open-ah pahnihna a ni bawk a. A vanglaia a tawn san ber tumin World No. 2 a ni thei a ni.
Tennis a khelh chhungin nomawi 31 a la tawh a, heng zingah hian 2011 WTA Tour Finals nomawi pawh a tel a. Kum 2016-ah khan Czech Republic chu Olympic bronze medal a lakpui a, Billie Jean King trophy pawh vawi ruk ngawt a la a ni.
Kvitova hian social media-ah a chawlh hun tur hi a tar lang a. “Fulnek khuaa seilian ka ni a, tennis ball ka vuak hmasak berna khua pawh a ni bawk a. Ka pa nen kan venga tennis court velah tennis kan khel thin a, professional tennis player ka nih hi ka ring phak ngai lo a. Khawvel hmun hrang hrangah inkhelin ka zin kual thin ang a, ram hrang hranga stadium mawi tak takah ka inkhel ang tih pawh hi ka ring pha ngai lo reng reng,” a ti.
“Chutiang chu a tak ramah ka tawng ve ta reng mai a. Kan nun kawnga bung thar kan kai hun ang kha a rawn thleng ve dawn ta reng mai a. Kum 2025 hi ka tan chuan season hnuhnung ber a ni dawn a, professional player ka nih tawpna tur a ni tawh ang,” a ti bawk.
Kum 10 kal ta chhunga player tha ber pawl, Kvitova hi grass court-ah chuan hneh a har thei hle a. Grand Slam nomawi a lak hmasak berin Maria Sharapova a hneh a, kum 2014 khan Eugenie Bouchard hnehin Venus Rosewater Dish title pawh a la bawk a ni.
Kum 35 mi, Kvitova hi August thlaa US Open-ah a tel leh ang a, hei hi a hun tawpna tur a ni tawh dawn a ni.