Indian railway ministry thuneitute chuan July thla atangin rel chuan man tihsan a ni dawn tih an sawi a; mahse, tihsan hnuhnungte ngaihtuahin a sanna hi a hniam ber tum niin an sawi.
Mail leh Express rela non-AC class rel chuan man chu kilometre khat zelah pawisa pakhata tihsan a ni ang a, AC class-te chu pawisa pahniha tihsan a ni thung ang.
“Kum 2020 leh 2013-a rel chuan man ennawn tuma tihsan ai chuan tun tuma tihsanna tur hi chu a hniam zawk a ni,” tiin railway thuneitu pakhat chuan news agency PTI a hrilh a. “Khawpui leh a chhehvela tlan thin leh season ticket neitute chuan man erawh ni tina veivak thinte a tihbuai loh nan khawih danglam ve a ni dawn lo,” a ti.
Second-class bikah km 500 tling lo chin chuan man chu a ngaia la kalpui tur a ni a. Km 500 a pelh chinah erawh chuan kilometre khat zelah pawisa chanvein chuan man hman lai aiin a to tawh dawn a ni.
Thuneitute chuan rel chuan man hi tihsan hnuhnung ber chu January 1, 2020 kha a ni a. Hemi tum hian rel pangngai leh mail/express rel second-class chuan man chu 1 paisa/km leh 2 paise/km-a tihsan a ni tih an sawi a. Sleeper class leh AC class-a chuan man pawh 2 paise/km leh 4 paise/km-a tihsan a ni bawk.
“Kum 2020 hmaa ennawn chu kum 2013 kha niin hemi tum hian class tin chuan man ennawna tihsan a ni a. Rel pangngaia second-class chuan man chu pawisa pahniha tihsan niin express/mail relasecond-class chuan man pawh pawisa palia tihsan a ni a. Sleeper class chuan man pawh pawisa paruka tihsan a ni,” tiin rel thuneituin a sawi a. “Kum 2013 khan AC II tih loh AC class chuan man zawng zawng chu 10 paise/km-a tisangin AC II chuan man pawh 6 paise/km-in a tisang bawk,” a ti.
July thla lo awm tur hi railways-in thil thar dang kalpui tan a tumna a ni bawk a, ministry chuan ticket hauh lawk nan Aadhaar behchhan OTP authentication a hmang tan dawn a ni.
July 1 atang hi chuan IRCTC official website leh mobile app atanga Tatkal ticket la lawk duh chuan Aadhaar card nena finfiahna an neih zel a ngai tawh dawn tihna a ni a. Online-a Tatkal booking ti duh chuan Aadhaar behchhan OTP authentication hi July 15 atang phei chuan tih ngei ngei ngai a ni tawh ang.