Aizawl: Food, Civil Supplies & Consumer Affairs Department chuan eirawngbawlna gas semtuten bukna dik thlap nen an semna hmunah leitute hmuh lai ngeia buk thin a nih tur thu an sawi.
Nimina thuchhuah an siamah, office atanga order chhuah thin tawh angin, LPG distributor-ten LPG fill cylinder an pekchhuah/sem dawnin Marketing Discipline Guidelines clause 1.4 ( d & f )-in a phut ang ‘gas bur tak awm buk dik tak chauh an phurchhuakin bukna dik thlap(correct weighing equipment) an keng tel ang a, customer hmuh lai ngeiin a dik leh dik loh an buk leh tur a ni’ tih hi an zawm ngei tur a nih thu an tar lang.
“Gas bur ruak rih zawng hi a burah hian a inziak vek a, Domestic LPG lak dawn chuan a bur rih zawng inziak leh 14.2 kgs (e.g.14.2+15 = 29.2 kgs) hi beih mai tur a ni. A’maherawhchu, Liquefied Petroleum Gas (Regulation of Supply and Distribution) Order 2000, clause 5-in a sawi angin a rih zawng tur dik tak aia 150 grams pel lova a zang emaw a rit zawk emaw anih chuan ngaihhnathiam tur a ni ang,” an ti.
Supply department chuan tunlai hian mi thenkhat, gas an book tih pawh hre lote hnenah Delivery Authentication Code (DAC) a thleng thin tih hriat a ni a, DAC hi gas dawn hunah chauh gas distributor-te hnenah pek tur a nih thu an sawi a. DAC an pek loha delivery report dawn pawh hi phal a nih loh avangin, hei hi thil serious tak a ni a, an hriat lohvin tuten emaw an hmingin gas an lo book tihna a nih thu an sawi a. Hei hian a nghawng chu kumkhat chhunga subsidy a gas an lak theih zat a ti tlem dawn avangin, hetiang thil tawkte chuan IndianOil ONE application atangin complaint theih a ni a, FCS&CA Department-ah pawh a thlen theih a nih thu an tar lang bawk.