Aizawl: Aizawl West II bialtu MLA Lalnghinglova Hmar-in nimin khan Vaivakawn, Zohnuai-a lei tlak hniamna hmun a tlawh.
Helai hmuna lei che thin hian vantlang kawng a tihchhiat bakah Vaivakawn thlanmual atanga Sairang Road (NH-6) thlengin a awh thla a ni.
Lei tlak hniamna hmun a tlawhna khawtlang hruaitute nen inkawmin, Minister chuan sorkar hmalaknate a hrilhfiah a. Lalnghinglova Hmar chuan Vaivakawn, Zohnuai lei tla hniam thin siam tha tak tak tur chuan a bulthut, lui dung atanga lei tawlh tur danna check dam siam a ngaih thu a sawi a. Thil hautak tham tak a nih avangin tun dinhmuna thil tihtheih awm chu chhiatna zualpui thleng thei laka invenna tura hmalak a nih thu a sawi.
Bialtu MLA chuan DM&R, PWD leh Geology & Mining department-te hmalakna hrang hrangte sawiin, Zohnuai lei tlahniam thawm thatna tur atan hian SASCI atangin Rs vbc 3.84 hmuh a nih tawh thu a sawi a, tui kawng mumal zawk, side-drain leh linked-drain te, gabion leh retaining wall-te siama a rang thei ang bera hmalak nghal a nih tur thu a sawi.
Geology & Mining Department-a Geologist Malsawmdawngliana pawhin, Vaivakawn, Zohnuai lei chet dan chu DGPS khawl hmanga an thlithlai reng thu sawiin, lei (soil) sakhat dan chungchang zirna pawh neiin lei verh (bore hole) pawh hmun rukah an neih thu te, hmun thenkhatah chuan lei hnuai feet 50 bawr velah lei sakhat an hmuh chauh thute a sawi bawk.
Minister hi Lalrinngheta, S.E, PWD bakah sorkar mi pawimawh dangten an tawiawm a ni.