Aizawl: School Education Minister Dr. Vanlalthlana chuan nimin khan Vana Pa Hall-ah School Education department hnuaia Adult Education Wing-in an buatsaih, Meichher Golden Jubilee lawmna chu khuallian niin a hmanpui a. Meichher Jubilee Special Edition a tlangzarh bakah Jubilee chhinchhiahna thu tar (monument) a hawng nghal bawk.
Minister chuan Adult Education Wing hnuaia chanchinbu chhuah thin, Meichher chu ram hmasawnna mei hliau kaia chhem alhtu hlu tak a nih thu leh kum upate hnena ziak leh chhiar zirtirna hmanraw tangkai tak a nih thu a sawi a. Meichher chanchinbua thu leh hla lama mi ropuite sulhnu chhiar tur tam tak a awm chu hlu a tih thu sawiin, he hmalakna hi duhtawk mai lova chhawmnun zel a tul tih a sawi.
Ziak leh chhiar thiamah duh tawk mai lo va, hmalam hun ngaihtuah chunga sum enkawl leh peipun dan thiam tuma ngaihven a tul thu sawiin Dr Vanlalthlana chuan, mahni inhaikuak tum tur leh mithiam zawkte rawn hreh lo turin a chah bawk.
School Education Department Director Angela Zothanpuii kaihhruai inkhawmah hian Meichhe editor hmasa ber, Padma Shri R. Lalrawna leh Meichhe editor ni mek, tuna Assistant Director i/c Adult Education T.C. Lalremsiama leh School Education Deputy Director (AE) R. Laltanpuii te pawhin thu an sawi.
Inkhawmah hian Golden Jubilee puala Mizo Academy of Letters (MAL), Mizo Writers Association (MWA), Mizo Poetry Society (MIPOTY)-te tangkawpin article inziahsiak leh poetry inphuahsiak huaihawt lawmman semna an hmang nghal bawk.