A vawi khatna atan India hockey player te chuan thla tin pawisa an dawng tawh dawn a, sports ministry chuan national camp zawm tura an thlan mipa leh hmeichhia te chu thla khata Rs. 25,000 dawntir an remti.
Ruahmanna an siam tharah Target Olympic Podium Scheme huangah infiammi 80 te chuan thla tin lawmman an dawng tawh dawn a. He thutlukna hi Mission Olympic Cell chuan Ninganiah khan an siam a ni.
Hetiang kalphung an kalpui vang hian sawrkar chuan thla tin cheng nuai 20 an seng ziah dawn a, infiammi lawmman la hnem deuh te chuan thla khatah Rs. 50,000 an la ang.
Sports Minister Mansukh Mandaviya chuan, “Hockey India hian hun eng emaw chen chu hetianga player te thla tin lawmman pek hi an beisei tawh a. Player te an che tha chho thin viau a, hei vang hian an thil beisei tihhlawhtlin pawh a phurawm a ni,” a ti.
Hockey India hian thla tina lawmman dawng thei turte hming hi sawrkar hnenah an theh lut thin dawn a, he mi beh chhan hian sawrkarin pawisa pawh a pe thin dawn a ni.
Sawrkar aiawh pakhat chuan, “Lawmman dawng thei tur an thlan dawn hian che tha deuh leh fit deuh te chu an ngaipawimawh hmasa tur a ni ang,” a ti.
India ram aiawha Olympics leh Asian Games bakah, inelna lian thama an tel changa lawmman an dawn an insem chu an sum lak luh a ni leh bawk a ni.