UFC star Jon Jones chu Tom Aspinall nen insual tura ngaih a nih mek laiin insual lampang ka ngaihtuah lo tiin a tawng chhuak.
Kum 37 mi Jon Jones hi UFC light heavyweight champion pawh lo ni tawh niin, a vanglaiin 28-1 record a nei thei a, March 2023 ah khan heavyweight title a la a ni.
Jon Jones hian November thlaah Stipe Miocic a hneh a, heavyweight title a kawl chu a humhim a, hei bak hi a insual zui leh ta miah lo a. Tom Aspinall nen insual tura tih an nih laiin Jones hian chhuanlam siamin a hun a pawt sei zel a, hei vang hian thil a chiang thei lo hle.
Tom Aspinall chuan heavyweight champion nihna chu thla 18 chhung a kawl lailawk a, champion tihchianna turin Jon Jones nen hian insual tura ruahman ni mah se Jones hian chhuanlam a siam ta zel a ni.
Chhuanlam a siam nasat tawh em avangin mi tam tak chuan Jon Jones-a title hlihsak turin UFC thuneitute an nawr nasa tawh hle a. American fighter hian an sawiselna chu chhang letin, tun dinhmunah insual lampang a ngaihtuah loh thu hi a sawi chhuak a ni.
Jones chuan, “Ka thisenah hian insual hi a la awm reng avangin ka chawl tih hi ka la sawi duh lo a. Chutih rualin tun dinhmunah insual lampang ka ngaihtuah lo. Insual chakna a rawn chhuah leh hunah, a rawn chhuak leh a nih chuan ka theihna zawng zawng nen ka rawn ti leh ang,” a ti.
UFC hotupa Dana White chuan tun hnaiah khan Jones hian Aspinall nena insual a remti niin a sawi a, ziah fel ngai erawh engmah an la ziak lo niin a sawi bawk a. UFC huanga heavyweight insual ropui ber tur tia an sawi hi a tak ram a thlen vat theih nan Jones-ai thutlukna siam tawp hun tur a tuk a ni.
Jon Jones hi UFC huangah vawi 16 a chak a, chak hnem ber record siamtu a ni a, fighter awm tawh zawng zawng zinga tha ber pawl tia sawi a ni bawk a ni.
Aspinall hi July thlaa Curtis Blaydes a hneha a title kawl lailawk a humhim bak a la insual leh ta miah lo a. An insual dawn a nih chuan kumin November thlaah New York khawpuia an insual loh pawhin December thlaah Las Vegas khawpuiah an insual ang.