Furpui kan hmachhawn mek. Kan inrin loh laiin ruahpui vanawn a lo sur leh thut thut dawn. A changin thli na tak te pawh a rawn keng tel leh thin ang. Monsoon ram kan ni a. Furpui hi awm lo sela he ram hi thlaler ram chenna tlak loh a ni ang. Furpui hi Pathianin he ram a siam tirh ata a dah tel, malsawmna a ni tih hi i hre nawn fo ang u.
He malsawmna kan dawn hi mihring ten kan lo dawnsawn dan azira chhiatna rapthlak a ni thei tih chu tupawhin kan hria a. Ruahpui vanawn lo thleng chu malsawm ruah a chantir lova, chhiatpui zawnga hmachhawn hlauh hi thil vanduaithlak leh chhiatna rapthlak a chang zing ta khawp mai. Tawn vanduai hrim hrim hi chu thil awm thei a nih ngei laiin kan fimkhur loh avanga chhiatna hi kan tawng zing zawk awm e.
Tunah hian june thla kan hmang ral dawn vel chauh a la ni a. October thla thleng ruah hi la sur thei a ni. Hemi thla 5 vel chhunga mihringte siamchawp, fimkhur loh avanga vanduaina thleng thei hi kan ngaihtuah tel reng a va tul em. A hmasa berin inchim, leimin thei kan bul hnaiah a awm em? Kan in leh a chhehvel luikawr te avangin leimin a awm thut thei em tihte hi mitinin mitmei reng ila. Kan lui tuite pawh a lo pung leh tan tawh dawn a. A hmaa kan daikai mai mai thinna pawh min len thei khawpin a tui a lo tam leh tawh dawn. Thal laia kan inbualna li te chu a lo thûk leh hle tawh dawn a. Tawngpawng ngam hun a ni tawh dawn lo tih kan hriat a ngai. ‘Hetah hian kan inbual thin’ kan tihna hmunah khan lung te chu a nal puat ang a. Tawlh palh a li a tawlh luh puat theih hun a lo ni leh ta.
Furpui ruahsur hi malsawm ruah a ni ngei tih hre rengin mitinin malsawmnaah i chantir ang u. Chu chu a siamtu Van Pathian duh dan pawh a ni ngei ang.