Mizoram Volleyball Association (MVA) chuan tunhnaia Mizoram chhunga leimin tuarte tanpuina atana ‘MVA Charity Volleyball Match & Charity Show’ an buatsaih-a an sum hmuh atangin nimin khan Sub-Hqrs. YMA Serchhip hnenah Rs. 1,00,000/- (cheng nuai khat) an hlan.
MVA hruaitute hian nimin khan Serchhip khua hi tlawhin Serchhip Sub-Hqrs. YMA Office-ah tanpuina sum hi an hlan a, he hunah hian MVA Vice President, Donald Lalthanmawia chuan tunhnaia ruahsur nasa avanga leimin tuar te tanpuina atan Mizoram Volleyball Association (MVA) chuan June 20, 2025 khan ‘MVA Charity Volleyball Match & Charity Show’ an buatsaih thu leh mipui te zarah sum leh pai pawh tam tham tak an hmuh thu a sawi a. Heng te hi Mizoram hmun hrang hranga vanduaina tawkte tanpuina atan hlan an rel angin Serchhip-ah rawn kalin tanpuina sum hi YMA ten tha an tih dan apianga an hman turin an rawn hlan tih a sawi a ni.
Tanpuina sum Rs. 1,00,000/- hi Serchhip District Volleyball Association (SDVA) President K. Tlangthanmawia chuan Serchhip Sub-Hqrs. YMA President Kawlthuama hnenah a hlan a, Serchhip khua in tunhnaia harsatna a tawh ah YMA te hmalakna chu chhuanawm a tih thu SDVA President chuan sawiin, MVA ten hetiang remchang an buatsaih pawh lawmawm a tih thu a sawi a. YMA leh Volleyball Association ten thawhhona tha tak an neih thu te pawh a sawi bawk.
He hunah hian Serchhip Sub-Hqrs. YMA President Kawlthuama chuan MVA te chungah lawmthu sawiin, vanduaina leh harsatna tawk te tana sum leh pai thawhtu Mizoram mipuite chungah lawmthu a sawi bawk a ni.
Tanpuina sum hlan tur hian MVA atangin Vice President Donald Lalthanmawia Khawlhring bakah Joint Secretary RK. Hmingthanga leh Asst. Secretary Johny Zonunmawia te kalin, tunhnai ruahsur-a leimin in chenna In a hnawl avanga nunna chan, Ramzolura, Serchhip P&E Veng ralna atan a chhungte hnenah Rs. 10,000/- an hlan bawk. Heng tanpuina hlanna hunah hian SDVA hruaitu ten tawiawmin, Serchhip-a hun an hman zawh hnu hian Hnahthial panin an chhuak leh nghal a ni.