Cristiano Ronaldo chuan Al Nassr chamchilh zel turin contract a ziak thar leh a, Portugal captain hian June, 2027 thleng thuthlung hi a ziak a, Saudi Pro League-ah hian kum hnih chu a la awm dawn a ni.
Kum 40 mi chuan, “A tawp ka la thleng lo a, kal zel ka la tum a ni,” a ti.
“Tei rei peihna, inpekna leh thawhhona tha hian hma min sawntir zel a, chu chu tuna ka tih ber pawh a ni a. Bung thar kan kai leh dawn mek a ni,” a ti bawk.
Ronaldo hian kum 2022 khan Manchester United chhuahsanin Al Nassr hi a zawm a, khawvela infiammi zinga hlawh hnem ber a nih theih phah a. Kum thum chhungin infiammi zinga hlawh hnem ber dinhmun hi a luah tawh a, June 30 thleng chauh contract a neih tawh avangin contract thar hi a ziak leh ta a ni.
Al Nassr tan hian vawi 105 a inkhelhah goal 93 lai a thun tawh a, heti chung hian trophy lian tham a lakpui thei rih lo a. Kum 2023 khan Arab Club Champions Cup chu a lakpui a, hei bak hi a la hlawhtlinpui thei chiah lo a ni.
Saudi Pro League 2022-23 leh 2023-24-ah te Ronaldo chuan Al Nassr chu pahnihna a nihpui ve ve a, season hman zawh chiahah khan pathumna an ni.