Bollywood-ah hming a chher rualin Hollywood sawmna erawh a chhang ngai lova, an ko eih zo lo a ni ber. Film lar tak tak, ‘Troy’, ‘Hancock’ leh ‘Seven Pound’ – ah te inlan tura ‘cial’ taka an sawm pawhin ramchhungah film a chan avanga a hman loh thuin a hnawl thin a, filmstar lar te pawhin an sawm chhuak zo lo. ‘Troy’ film hit tak maia a inlan loh chhan bul ber chu tlaikhaw hnu ah Aishwarya hian a sawichhuak a ni.
Aishwarya Rai chuan, “Ni e, hei hi a chhan bul ber a ni. ‘Troy’ kha film hit tur tih pawh ka hre lawk vek a, mahse, a thawnthu-ah khan nupa nun tarlanna te a awm a, ‘inchuks’ te a awm nual bawk a. ‘Lalpa le, a ni thei dawn em ni’ ka tichhuak hial a, ngaihngam taka chan kha ka zuam lul lo a ni,” tiin a sawi.
Hollywood sawmna a hnawl chhan pawh sawi nghal-in, Ash chuan, “Ka rilru mil leh duhzawng a nih loh vang a ni miah lova, rampawna chhuaha, film siam ka tui loh vang pawh a ni hran lo. A chhan bera zawk chu, hna ka ngah em avanga hun awl ka insiam theih loh vang a ni,” a ti.
Hollywood director eng-emaw zatin an vehthlem nasa viau na a, tun thleng hian an la beidawng ta fo mai. Ash hian ‘yes’ ti ngat se la chuan, “Rush Hour” leh “Troy” ringawt pawh kha nasa lehzuala larpuina tham a ni dawn a, sum leh pai zawnga chhut phei chuan inhaivur theihna remchang lutuk a ni.
“Hman kuma Michael Douglas-a a lo kal tum khan press conference-ah ka inhmeh tur nia ngaiin thawnthu a rawn keng tawh a. Will Smith pawhin film pahnihah min rawn be tawh a, mahse ka remchan loh thu-in ka chhang a ni,” tia sawiin, ‘Troy’ a a chan lohna chhan lian takah chuan tideuh kengkunga inlan leh ‘sexy’ tak maia, Brad Pitt-a bula khawsak tur kha a ngaingam lo, a ti bawk.