Chief Minister Lalduhoma chuan Mizoram tana a that phawt chuan central-ah eng party pawh sorkar se an thawhpui thei tih a sawi.
Thawhtannia MZP General Headquarters bultuma Aizawl Lammualah Remna Ni lawmnaah Chief Minister Lalduhoma chuan, “Indona hi a man a to em em a, fahrah leh hmeithai a siam a, ralthuam siam nan sum leh pai tam tak a luangral a. Zalenna a bo va, ram hmasawnna a tithuanawp a, a awm sa pawh a tichhe thin,” tiin, remna leh muanna hlutzia hre tawh hnam an nih ang ngeiin, Mizoramah remna a awm zel theih nan sorkar chuan theihtawp a chhuah dawn tih a sawi.
Ram leh ram indona ni lo, sakhua vanga indonate hi nunna latu langsar a ni tih sawiin Lalduhoma chuan, “Kristian sakhaw chhungah pawh ngaihdan inang lo vanga inepna a awm zel a. Kan ramah ngei pawh a thleng mek a, khawhar ina lâm za thinte biak in pakhatah kan inkhawm thei lo. Heng kan ngaihdan inan lohnate hi inhrethiam tlang taka kan kalpui a ngai,” tiin remna hi kawng tinrengah vawng nung thiam turin a chah.
Chief minister chuan inkalpawhna kawngah Mizoram chhim lam leh hmar lam atangin nasa takin hma an sawn dawn tih a sawi a. Hnam dang, sakhaw dangte nen tun aia hnai zawkin an khawsa chho zel dawn tih sawiin, “Mizo nationalism hi vai huat tihna a ni lo. Nationalism dik tak chu hnam dangte thiana siam a, an hmasawn anga hmasawn ve a, a tul anga an hnen atanga zir leh thawhpui a ni. Central sorkar nena kan inrema kan kal dun thiam a ngai,” tiin, Mizoram tana a that phawt chuan central-ah eng party pawh sawrkar se, an thawhpui thei tur tih a sawi.
Tun hnaia home minister-in thuthar thehdarhtute a kawmnaah Mizorama dan bawhchhiatna thlentu zat ve hi raltlante thlen a nih thu a sawi tih sawiin Lalduhoma chuan, Zohnahthlak an unau, fel tak takte kara mi sual tlem azawngte thiltih chu pawi a tih thu a sawi a. “Kan unaute hian kan dante hi lo zah rawh se, kan khawtlang nunphung leh tihdante lo pawmin lo zawm ang che u,” a ti bawk.
MZP Vice President Dr. C. Lalremruata kaihhruai inkhawmah MNF President H . Lalthianghlima pawhin thu a sawi.
Lammuala Remna Ni lawmnaah hian Home Minister K. Sapdanga, Minister B. Lalchhanzova, Minister F. Rodingliana, Deputy Speaker Lalfamkima, Adviser to Chief Minister Lalmuanpuia Punte-te an tel a ni.