Mizoram in India sorkar lak atanga inlakhran tumin, mahni kutke ngeia din tumin zalenna a sual a, mahni ke a ding tura zalenna a sual ngam kha a mizo a, a tunlai tawng takin a ‘pa tek tek’ asin.
Mahni ke a din tum a nih miau avangin beihpui a thlakna kawngah beih a tawk nasa hle a, pawisawi lo tam takin an tawrh phah bawk. Kan tawrhna kha a na a ni!
A duh ang thutlukna siam thei lovin, a beihna kawngah a tum hlawhtlinpui thei ta lo mah se, state erawh kan neih phah ta thung a. Zalenna sualtute kha an va zahawm em.
Hun a liam zel a, chhuan thar lo awm zelin, zalenna sualtute sawinep leh sawiseltute an lo awm chho ta zel a, a pawi hle. Zalenna hlutzia hi sawia fiah mai chi ni hian a hriat loh a, kan state nih theihna kawngte hi kan mihuaite thisen vang a ni asin.
Sawinep leh ngaihnep chi a ni lo a, thangtharte tana kawng tam taka an thil min hnutchhiahte hi a hlu a, kan hriat thar fo reng pawh a va tul em.
Inremna thuthlung ziahna ‘Remna Ni’ te hi chawlh satliah ang maia kan ngaitate hi inenfiah kan ngai ta viau mai. Sorkar chawlh dang nen a inang lo a, eng political party pawh lo sorkar se, kan hlut a, urhsun taka kan hman fo pawh a tul hle.
Kan tu leh fate hian remna leh zalenna man tamzia leh thisen chhuah tam zia hi hria se la, inhrilh zel ila, chumi avanga hlut a, urhsun taka hman tur a ni tih pawh an thinlungah tuh i tum zel ang u.