Ruihhlo do dan tha kalpui thei sorkar tunge?

• Dr. C. Lalrampana

A KAMKÊUNA

Mizoram hi Southeast Asia-a traditional golden triangle Thailand, Laos leh Myanmar-ah a tel lova, India hmarchhak state pakhat a ni a, hmar leh chhak lamah Myanmar leh thlanglamah Bangladesh ramri kan nei a, State ramrite chu Assam, Manipur leh Tripura te an ni. Myanmar ramri 404 km+ Bangladesh ramri 318 km tiamin 722 km international ramri kan nei. Mizoram zauzawng hi sq. kilometer 21,081 a ni. Heng kan ramrite hi chhuanlama siamin ruihhlo do harsatna kan sawilang fo va, mahse, chhuanlam tling a ni ber lo. A nihna takah chuan kum 41 (1984-2025) ruihhlo kan do chhung zawng khan kan ram hruaitute leh puithiam rualte’n zu (wine) ringawt an âtchilh avangin leh tihtakzeta ruihhlo kan do tak tak loh vang te, ruihhlo hlauhawm do kawngah sawrkar benharh hleih theih a nih loh vang a ni ber. Chuvangin, “sebo hnua se kawngkhar ang” tih ang maiin a harsat tawh hnuah sawrkarin a ngai pawimawh thar ve dawn chauh tihna a ni a, dorem chu a khirh tawh khawp ang? Engpawhnise, mi ramin ruihhlo an do dan atanga tangkaipuina kan neih ve mial takin Philipine sawrkarin ruihhlo a do dan tlangpui I lo tarlang teh ang.

PHILIPPINE RUIHHLO DO DAN

Philippine-ah hian July 1, 2025 thleng khian mihring maktaduai 116.79 an tling dawn a, Mizoramah erawh mihring nuai 12.52 vel lek kan la ni. Philipine-ah hian ruihhlo ngai mi maktaduai 4.5 an awm a, kum 2020 khan mi 695 chauh ruihhlo thih phah an awm. Ruihhlo ngai an tam ngaihtuahin thi erawh an tlem hle.

Comprehensive Dangerous Drugs Act of 2002 hi Philippines rama ruihhlo dan bawhchhiatna chungchanga dan bulpui ber a ni a, ruihhlo kaihhnawih thil sual hrang hrangte hremna bik a tarlang bawk.

Philippines hian kum 10 dawn lai chu ruihhlo a do tawh a, tuna ruihhlo dona hi July 1, 2016-a Rodrigo Duterte president a nih lai khan a ni. He campaign hian phase hrang hrang a paltlang a, approach hrang hrang a nei bawk.

Ruihhlo dona kawnga hmasawnna pawimawh tak takte chu tarlang ila:
Duterte’s Presidency (2016-2022): Ruihhlo donaah hian inthahna (extrajudicial killing) leh dan bawhchhiatna nasa tak a awm a, chuvang chuan Drug dona kawnga hmalaknaah mi 6,229 thah an ni a, mi 327,039 man a ni. Damdawi thuhrukna leh a ruka ruihhlo khawihna hmun (clandestine laboratory) 1,130-te chu tihchhiat a ni.

Marcos’ Presidency (2022-present): A kalphung chu “thisen chhuak lovin ruihhlo dona kawngah a inthlak a, a ngaihtuah dan tur chu: Prevention leh rehabilitation; Dan enforcement tichaktu a ni a, mi tam tak ruihhlo hralhtu leh zuartute chunga beihpui thlakna tur a ni. Dan lova ruihhlo tam tak siam, kum thum kalta chhunga record ?62 billion man shabu telhte pawh a tel. President Ferdinand Marcos Jr. chuan ruihhlo dona kawnga remna zawnga hmalak a pawimawh thu a sawi a, mimal tihnat ai chuan ruihhlo tihchhiat a pawimawh thu a sawi. Strategy thar hian result tha tak a pe chhuak niin a lang a, damdawi man hnem leh chhawmdawlna (rehabilitation) lam ngaih pawimawh a ni. Philippines sorkar chuan ruihhlo hmansual leh hralh, dona kawngah hmalakna hrang hrang a kalpui a ni. Hetah hian ruihhlo laka ram an humhim dan chu hetiang hi a ni: Sawrkar agency pawimawh tak tak te chu:

1. Philippine Drug Enforcement Agency (PDEA): Ruihhlo dona kawnga dan kengkawhtu agency lian ber, damdawi hlauhawm, controlled precursors, leh chemical pawimawh tak tak venna, chhui chian leh dona kawnga mawhphurtu.
2. Dangerous Drugs Board (DDB): Ruihhlo venna leh thununna chungchanga policy leh programme siam leh siam chhuah hna thawktu policy siam leh strategy-formulating body Drug dona kawng hrang hrang.
3. National anti-drug plan of action: Ruihhlo hmansual leh hralhna dona atana ruahmanna felfai tak, invenna, zirna leh siamthatna programme-te pawh a huam tel.
4. Oplan Double Barrel: Police operation pakhat chuan target man to tak tak leh street-level dealer te a target a, chu chu component pahnih a awm a, chungte chu Oplan Tokhang (lower barrel approach) leh oplan HVT (high-value targets) te an ni.
5. Rehabilitation and Education: Sawrkar chuan ruihhlo hmansualna leh zirtirna, rehabilitation center siam that, leh ruihhlo tawlhrukna hmun lian tak tak neite chunga “airtight case” siamte a ngaih pawimawh ber a ni.

AN HLAWHTLINNA CHU?

Philippine hian nasa taka ruihhlo a do vang hian tun hnaiah hlawhtlinna an nei chho nasa hle a ni. hetiangin:

1. Seizure of Narcotics: Marcos administration hnuaiah PDEA chuan July 2022 atanga tun thlengin PHP tluklehdingawn 50 vel zet ruihhlo man a ni tawh.
2. Drug-Free Communities: Khaw hrang hrang ruihhlo nei lo anga puan tumna chu a hlawhtling a, PDEA-a Regional Validation Board-in ruihhlo tel lo khawtlang 3,555 a nei tawh a ni.
3. Drug dona kawng hrang hrang
   National anti-drug plan of action: Ruihhlo hmansual leh hralhna dona atana ruahmanna felfai tak, invenna, zirna leh siamthatna programme-te pawh a huam tel.
4. Oplan Double Barrel: Police operation pakhat chuan target man to tak tak leh street-level dealer te a target a, chu chu component pahnih a awm a, chungte chu Oplan Tokhang (lower barrel approach) leh oplan HVT (high-value targets) te an ni.
5. Rehabilitation and Education: Sawrkar chuan ruihhlo hmansualna leh zirtirna, rehabilitation center siam that, leh ruihhlo tawlhrukna hmun lian tak tak neite chunga “airtight case” siamte a ngaih pawimawh ber a ni. Sawrkar chuan mimal addiction hneh theihna tura rehabilitation center leh khawtlang hruaitute’n an hmalaknate a pawimawhzia a sawi uar hle.

Tarlan tak ang khian Philipine chuan kum 10 ruihhlo a do chhungin mi 6,229 a tihlum hman a, mi 327,039 a man khawm hman a. Damdawi thuhrukna leh a ruka ruihhlo khawihna hmun (clandestine laboratory) 1,130 a tichhe hman bawk a, keini nen khaikhin chuan an che pui rem rem hle. Mizoramah chuan inkhaihlum chu sawi loh ruihhlo zuar leh tawlhru mante pawh an tang rei lem lo hle nia sawi a ni. Philipine tih ang deuh hian sawrkar hian tihtakzetin ruihhlo do beihpui hi thlak se, ruihhlo hi kan do rem thei deuh ngei ang. Mizoramah chuan sawrkarin huaisen takin hma a hruai ngam lova, engkim mai hi NGO leh kohhran kutah a dah a, an1kawng sahkuakah a kal ve hne hne thin a ni.

MIZORAMA RUIHHLO DO DAN TUR

Mi ram ang bawkin sawrkar hmalaknain huaisen takin hetiang hian ruihhlo do beihpui thlak ni ae, tun ai hian kan ziawm ngei ang. Hetiangin:

1. Ruihhlo lo luhna kawngpui Myanmar & Bangladesh international ramri 722 km-a thuiah hian Central Force duty-te bakah special force dinin kea kalna, 2wheeler, sakawr kal khan awm zawng zawngah uluk takin 24×7 duty dah se. State ramri Assam, manipur & Tripura ramriah duty dah vek ni bawk se. Ruihhlo tawlhru man apiangte chu tan in hran bik siamin khauh taka vengin tantir hmiah zel se.
2. Ruihhlo eng chi pawh man hmasak apiang dahkhawl lovin hal ral nghal hmiah hmiah zel se, dahkhawl a nih hian thenkhat sawi danin a mantute hian chhep relhin an zuar ru a, anmahni ngei pawhin an ei ve fo thin niin sawi a awm. A bikin zu man phei chu a riral nasa thei hle nia hriat a ni.
3. Ruihhlo zuar leh ruihhlo ngai khawlaia vak chhuak apiang man khawm hmiah hmiah zelin lock up hran bik siamah khung hmiah hmiah se. An thiltih azirin hrem dan tur kalpui nghal zel bawk se.
4. Ruihhlo zuar leh Ruihhlo khawih apiang man thei turin non-gazetted & gazetted officers- te leh NGO hrang hrang hruaitu chin leh VC/LC-te thuneihna pe vek se, annin END-ah pe nghal hmiah hmiah zel se.
5. Mizoram district khawpui tinah ruihhlo zuar leh ruihhlo ngai man khawmte dahna Local Jail siama khung thin ni se, an case a zirin District Jail/Central Jail-ah dah nghal zel ni se.
6. Damdawi thuhrukna leh a ruka ruihhlo khawihna hmun (clandestine laboratory); stock point awm theite zawnchhuaha tihchhiat hmiah hmiah zel ni se.
7. District khawpui tinah ruihhlo ngaite enkawlna Rehabilitation Centre siamin qualified faculty dahin Health care provider-te nen uluk taka enkawl ni se, zu ngawl vei leh Drugs addict-te thliar hrangin dah hrang bawk se.
8. District khawpui tinah ruihhlo zuar, tawlhru leh Ruihhlo ngaite report-na hmun tur call centre dahin toll free hnangin biak reng theihin awm se, 24×7 duty dah ni bawk se. Chhungtinin report pek tur a awm chuan pek nghal zel ni se.
9. Mizoram pumah Drugs free city/village & dry city/village ni thei tura inelna thianghlim nei thei turin khawtinte a inzirtir uar ni se, intensive chhenfakawm tak nen inelna kalpui thin ni se.
10. Ruihhlo tam zualpui do hneh a nih hma chuan state sawrkarin ruihhlo do beihpui thlak nan END -ah Budget hnianghnar tak dah bawk thin se.
11. Kohhran hrang hrang leh NGO hrang hranga nihna nei ruihhlo leh zu laka fihlim lo apiang ban nghal hmiah hmiah thin ni se.
12. Sawrkar hnathawk zingah Ruihhlo ngai leh ruihhlo zuar ru an awma man chhuah apiangte chu an case azira suspend emaw ban nghal zel ni se.

A TLÂNGKAWMNA

Mizoram hian kum 41 ruihhlo do kan kalpui tawh a, tu Party Ministry mah khan The Narcotic Drugs and Psychotropic Substances Act. (NDPS Act) 1985 dungzuia The Mizoram Drug (Controlled Substances) Act, 2013/2016-te hi tha taka a nihna anga an kalpui loh avangin ruihhlo tawlhru, zuar leh ruihhlo ngaite an zalen hle. Philippine chuan kum 10 lek ruihhlo a do chhungin nasa takin theihtawp chhuahin a bei a, tunah chuan HIV+ prevalent-ah leh ruihhlo do kawngah nasa takin hma a sawn tawh a, khawvel huapah pawh an hming tha tawh hle. Mizoram erawh tunah hian kan hmingchhe hneh hle. NE state bikah phei chuan Mizo tawh phawt chu smuggler vekah min ngai tawh hial niin a lang a, cancer tamna ber, HIV+ tamna ber, ruihhlo leh ralthuam hlauhawm tawlh ruk tamna ber tih hi miin min hmelhriat dan a ni ta ber mai. Chuvangin, kan sawrkar hian hetiang hnihne lo deuh hian ruihhlo do beihpui hi kalpui se thangthar lokal zel turte seilenna tlak ZORAM NUAM a hmaa mi ang kha kokirleh turin tan la zel se a van duhawm tehlul êm! Aw! Zoram chhan tlak i la awm e.