Union Home Minister Amit Shah-a chuan Maoist-te chu an biak dawn loh thu a sawi a, an pawla telte chu an ralthuamte daha police hnena inpe tur leh nunphung pangngai zawm ve turin a sawm.
Nizamabad, Telangana-a Turmeric Board National Headquarters a hawnnaah Shah chuan, “Congress chuan sorkar hi Maoist-te be turin a ti a. Kan sorkar policy erawh ralthuam kengte ‘biak loh’ a ni a. Ralthuam daha inpein nunphung pangngai zawm rawh se,” a ti.
India hmarchhakah pawh mi 10,000 chuangin an ralthuam tunga nunphung pangngai an zawm tawh thu a sawi bawk.
Kum khat leh a chanve liam ta chhungin Maoist 2,000 chuang inpe an awm tawh a. “Ralthuam tungin inpe rawh u. A nih loh chuan March 31, 2026-ah chuan Naxalism hi kan ramah a tawp tawh dawn,” tiin home minister chuan a sawi.
Adivasi-te chenna hmunah kum 40 chuang chhungin Maoist-te tharum thawhna avangin mi 40,000 chuang an thi tawh a, “Adivasi tam tak an taksa peng hloh leh nunna hloh an awm tawh,” a ti.
Maoist-te biak duhtute chu engtin nge nunna chân Adivasi chhungkua leh venhim hna thawktu chhungkuate an chhan dawn tih a sawi bawk.
Shah hian Telengana Chief Minister A Revanth Reddy-a chu Maoist chen nana an state phal lo turin a chah a. “Eng emaw tih tawh pawh a lo nei mai thei a; mahse, ka sawi nawn leh duh chu Naxalism hi kan ram pumah March 31, 2026-ah chuan kan titawp tawh dawn,” a ti.
Sorkar laipui chuan kum 11 liam ta chhungin ram chhunga firfiaka beihna lian an tawh chu an chhang let tih Shah chuan a sawi a. Uri-a firfiak chetna chu surgical strike hmangin an chhang a, Pulwama beihnaah thlawhna hmangin an chheng let a. Pahalgam beihna pawh tun hnaiah an chhang let tih a sawi.
Shah hian turmeric board a hawn chungchang pawh sawiin sorkar laipui chuan kum 2030-ah chuan US $ tluklehdingawn khat man hu aieng thawn chhuah hman a tum thu a sawi a. Board chuan packing, branding, marketing leh thawn chhuah lam a ngaihtuah danw tih a sawi.
Turmeric Board hi Nizamabad-a aieng chingtute duh a ni a, inthlanah pawh khan BJP chuan din an lo tiam a ni.