Sudan khawchhak lama rangkachak laih chhuahna khur chimah a thawk lai mi 11 an thi niin he hmuna hna thawk sorkar enkawl company chuan Pathianni khan a puang.
Sudanese Mineral Resources Limited Company-in thuchhuah an siamah Nile River province khawchhak lam, thlalera Houeid khuaa Kersh al-Feel mine hi kar tawp khan a hmun thenkhat a chim niin an tar lang a. Thawktu dang pasarihin hliam tuarin damdawi inah dah an ni tih an sawi bawk.
Company hian thil laih chu an tawpsan rih a, helai hmun vela thil lai chhuaka hna thawk ve angte pawh hna thawk rih lo turin an ti bawk.
Sudan hi khawvela rangkachak lai chhuak tam ber ram zinga mi a ni a; mahse, himna dan an zam that loh avangin chhiatna lian tak tak an tawk fo thin.
Kum 2023 pawh khan tuna mi ang hi thlengin mi 14 an thi a, kum 2021-a chhiatna thlengah mi 38 an thi bawk.