Real Madrid chu FIFA Club World Cup khelh meka mipui hip khawm nasa ber an ni a. An khelh tawhah Spanish club lian inkhel entu an pung khawm hnem thei hle.
CWC khelh tawh hoah hian chawh rualin entu 34,770 awm zel ang an ni a, club malah chuan Real Madrid chu mipui hip khawm hnem ber niin, an inkhelh apiangin entu mipui 65,825 awm ziah anga chhut a ni.
America rama khelh mek CWC hi NFL stadium eng emaw zatah an khel tel ve a, stadium a zau tha hlawm bawk a, entu tam zawk leng thei tura beisei an ni.
Khelmual a zau a, tlema club lar vak lo inkhelah chuan entu an tlem thei hle thung a. Paris Saint-Germain-in 4-0 a Atletico Madrid an hneh tum khan Rose Bowl chhungah entu mipui 80,619 an awm a ni.
Tun tumah hian Real Madrid chuan mipui an hip khawm hnem thei viau a, vawi thum an khelh tawha entute chu chawh rualin 65,825 anga chhut a ni a, anni aia mipui hip an awm lo.
Champions League nomawi latu, Paris Saint-Germain inkhel entu chawhrual chu 61,649 an ni a, Atletico Madrid inkhel entu chawh rual chu 51,749 an ni bawk a. American club, Lionel Messi khelhna, Inter Miami inkhel entu chawh rual chu 51,208 an ni.
South American club lian, Palmeira chu inkhel entu hip khawm hnem lamah pangana an ni a, chawhrualin 47,456 an ni a. Stadium zingah South Florida-a Hard Rock Stadium chu entu kal that berna a ni a, chawhrualin entu 52,955 awm ziah ang an ni.
Inkhelh tawha entu la tlem ber tum chu Mamelodi Sundowns leh Ulsan HD inkhelh khan niin mi 2,412 chauhin an en a. Khaw hrang hrang 11-a stadium 12-a inkhel entu awm tawh zawng zawng belh khawm chu maktaduai 1.668 a ni.