Aizawl: June 26, 2025-a khawvela journalism chawimawina ropui, Emmy Awards dawngtu BBC team zinga Mizo journalist pahnih, HC Vanlalruata leh Isaac Zoramsanga te chu nimin khan I&PR, P&S Minister Dr Vanlalthlana’n a pisa-ah chawimawina a hlan.
Mizo journalist pahnih telna BBC team hian ‘Myanmar’s Civil War’ tih thupui hmanga short-form documentary an buatsaih hian National Academy of Television Arts & Sciences (NATAS)-in News & Documentary Emmy Awards, vawi 46-na a sem chhuah takah Outstanding Continuing News Coverage – Short Form category-ah award an dawng.
Chawimawina hun buatsaihna Minister Dr. Vanlalthlana chuan India ram mai ni lo, khawvel huap lawmman chhuanawm tak dawngtute chu fakin Mizoram journalism khawvel tan pawh hmasawnna lian tak a nih thu a sawi a. Journalist-te chu vantlang mipui mai bakah khawvel hmaa thil nih dan dik tak phochhuaktu pawimawh an nih thu a sawi a. Journalist tha ni tur chuan mi huaisen leh dikna ngaina mi ni a tul thu leh, journalism tangkaina leh hlutna te an hriatchhuah thar a, hmasawn zel tum tur an nih thu a sawi.
Minister-in chawimawina a hlan hian lawmpuina thuziak leh pawisafai Rs 10,000 ve ve a keng tel a ni.
Inkhawmah hian I&PR, P&S Secretary Betsy Zothanpari Sailo, I&PR Director Lalnunkima leh MJA hruaituten thu an sawi bakah lawmman dawngtute pahnih pawhin an thil tawn leh an buaipui dan tlangpuite an sawi bawk.