Lengteng bialtu MLA F. Rodingliana chuan tun hnaia lei minin a tihchhiat, Ngopa Community Health Centre (CHC) chu nimin khan a tlawh.
Ngopa CHC a tlawhnaah Minister of State chuan lei minin a tihchhiat belh zel tur venna tur leh OPD building luah ngamloh sawn lai lawk dan turte a enfiah a ni.
Leiminin Ngopa CHC a tihchhiahna hmun a tlawh zawh hian bialtu MLA F. Rodingliana kaihhruaiin Saitual district Bawrhsap Dr. Lalngura Tlau leh Dr. R. Lalnienga, Champhai Chief Medical Officer te nen khawtlang hruaitute a kawm nghal.
An inkawmnaah Minister chuan geologist ten lei chet dan te an zir chian nghal tur thu leh a siam that dan tur pawh NHIDCL te leh PWD bakah NHM Technical Wing lama mithiamten ruahmanna an siam thuai dawn tih a sawi a. Leimin avanga harsatna a thlen hma daih atang tawha Ngopa CHC building chu sak that tura ruahman tawh a ni tih sawiin, sak thatna tur pawisa pawh a awm tawh thu a a sawi.
Bialtu MLA chuan Ngopa CHC chu hun lo kal zel tur thlir chunga khum 50 tal awm tura tihlen a tul thu sawiin, a tul chuan damdawi in awmna pawh sawn mai turin hma thlir thui tak nei turin khawtlang hruaitute leh official kalkhawmte chu a chah.