Mizorama pawl paliten Mizoram kawngpui pawimawh, Kolasib – Sairang chu Mizoram mipuite tana pawimawh a nih avangin sorkarin hma rang taka a la lo a nih chuan mipuite hnatlanga an chhuah mai a ngaih tur thu an sawi.
Nimin khan Mizoram Transformation Movement (MTM), Centre for Environment & Social Justice (CESJ), Mizoram First (MF) leh Citizen Alliance for Truth & Justice (CATAJ) ten Aizawl Press Club-ah thuthar thehdarhtute kawmin Kolasib leh Sairang inkar kawng chu zawh hleih theih loh khawpa chhia te, motor tlu leh tang khawpa a awm thin thu sawiin châk leh mamawhte lak theih loh khawpa a awm chu pawi an ti hle tih an sawi a, kawng chhiaa dahtute an dem takzet tih an sawi.
Mizoram Transformation Movemnet President Dr Lalbiakmawia Ngente chuan NH06 package 8 (Kawnpui atanga Khamrang) kawng chu PWD minister-in June 30, 2025-a a sawi danin Mizoram PWD mawhphurhna ni lo anga a sawi chu vawiin thlengin Mizoram PWD enkawl a la ni tih sawiin, “Minister hian thu dik ziktluak lo, mipuite rilru hruai kawi nan a sawiah kan ngai a, a pawi kan ti hle,” a ti.
Dr Lalbiakmawia Ngente chuan Kawnpui leh Khamrang inkar kawng pawimawh hi tu enkawlna hnuaiah pawh awm se, a ram neitu Mizoram sorkar mawhphurhna nia an hriat thu a sawiin, “Mizoram Tripper Association mangang pawhin siam tura hma an lak ngam chuan sorkar meuh chu mawhphurhna laa hmahruai turin kan beisei tlat a, kawng siamna tur boulder tlem te chauh thawhchhuahpui mai lovin, hmanrua tha ber ber nena thawk chhuak nghal turin kan beiseiin kan thlir reng a ni,” tiin, he kawng hi Mizoram mipui zawng zawng tana pawimawh a nih avangin sorkarin hma rang taka a la lo a nih chuan mipui hnatlanga chhuah a ngaih tur thu a sawi bawk.