Aizawl: Minister of State Lalnghinglova Hmar chuan nimin khan New Delhi-ah sorkar laipui hotu hrang hrang kawmin Mizoram mamawh a thlen.
Excise & Narcotics Minister Lalnghinglova Hmar chuan Narcotics Control Bureau Director General Anurag Garg kawmin, Mizorama ruihhlo hluar do turin thawhho tha zawk neih a tul thu a thlen a. Myanmar ramri kaltlangin ruihhlo a lo lut nasa tih sawiin, intelligence-sharing leh thawktute training pek kawngah Mizoram Excise & Narcotics department thuam chak a tul thu a sawi.
An inkawmnaah hian Myanmar atanga ruihhlo lo lut do kawngah tun aia inhnaih leh inpawh zawka thawhho dan tur an sawi dun bakah, Mizoram leh hmar chhak state danga narcotics kaihhnawiha thawkte tan capacity building training an buatsaih tur thu leh Aizawlah NCB Zonal Office hawng tura ruahmanna a awm mek thu Anurag Gard chuan a sawi.
Sports & Youth Services minister ni bawk, Lalnghinglova Hmar chuan nimin vek khan Ministry of Youth Affairs & Sports-a Secretary (Youth Affairs) Dr. Pallavi Jain Govil pawh kawmin, department hnuaia thalai hmasawnna kaihhnawih activity hrang hrangte chu Mizoramah nghah ve thin nise a duh thu leh, Mizoram pawn atanga thalai tam zawk hip thei turin Aizawlah Youth Hostel sak a ngaih thu a thlen.
Youth Affairs Secretary chuan a theih anga hma an lak tur thu a sawi a ni.
Tourism minister ni bawk, Tetea Hmar chuan Department of Public Enterprises (Ministry of Finance) Secretary Moses Chalai pawh kawmin, Mizoram chu state te, budget pawh lian lo tak a nih avangin, hmasawnna hnathawh kawngah Central PSE te kaltlanga puihna awm theite a sawipui bawk.