BJP Mizoram President Dr K Beichhua, MLA chuan an party chu a bulthut atanga theihtawpa siam that leh tihchak hna an thawk dawn tih a sawi a; kum 2028 MLA inthlanpuiah a tam thei ang ber MLA neih an tum ni lovin, sorkarna siamnaah tel an tum thu a sawi.
Nilaini khan BJP Mizoram president atana thlan thar, Dr K Beichhua chuan Atal Bhawan-ah thu thar thehdarhtute a kawmin, president a nih anga party hmalakna tur leh tih tur pawimawhte a sawi a. An kal zel dan turah tum an neih thu leh kawng remruatsa awm chu an zawh dawn tih a sawi.
Dr K Beichhua chuan ‘India tihhmasawn’ tih a nih angin ‘Mizoram tihhmasawn’ tih chu an thupui a nih thu a sawi a. Mizote inpumkhatna tha tak an neih zel theih tur leh Mizo hnam nihna humhalh leh chawikan bakah Kristian sakhaw chawikana vawnhim tlat chu an party thil tum a nih thu a sawi.
Siaha bialtu MLA ni bawk, Dr K Beichhua chuan an hmalak dan turah chuan pakhatnaah BJP party chu a bulthut atanga theihtawpa siam that leh tihchak hna an thawk dawn tih sawiin, “Unit a tam thei ang ber din kan tum,” a ti.
Mi thenkhatin tawngkam vangin BJP party chu Kristianna a dodaltua chhal a ni chu thu dik lo a nih thu sawiin Dr K Beichhua chuan, “BJP hi Kristian dodaltu party ni lovin hmasawnna hmathlir neia hmala mek kan ni,” tiin, BJP chu development vision neia din a nih thu leh Kristian-te tana party hlauhawm an nih lohzia tlangaupui an tum bakah hun kal zelah BJP nihna dik tak mipuiin an la hriat tur thu a sawi.
BJP Mizoram president chuan an party member zingah thawhhona tha tak neih zel theih nan hmalak a tum thu leh thawhhona hrisel tak neia boruak kalpui an tum tih sawiin, kum 2028-a MLA inthlanpuiah Mizoramah MLA a tam the ang ber neih an tum mai ni lo vin, sorkarna siamnaah tel an tum tih a sawi a. Mizo thalaite chu Mizoramah development thlen tir turin BJP zawm turin a sawm nghal bawk.