Rimawi khawvela musician hralh tla ber zinga tel hian rilru lama chian lohna chikhat, ‘anxiety’ chu nitin a buaipui a, lar namen lova a lar hnu phei chuan kum 34 mi tan manganna tham a tling. Lar hi atan harsatna thlentu a ni zawk mah.
Ed Sheeran chuan, “Kum 10 chuang kalta atang tawh khan nitin ka manganpui a, ‘anxiety’ hi paihbo tak tak theih pawh niin ka hre ta lo. Phone khawih lovin ka awm chhin a, email te pawh ka chhiar tlem a, thiante pawh ka hlat hret hret zel a, ka rin tak tak mi tlemte bak ka kawm tawh lo. Social anxiety hi a nasa ngang mai.
“Puipunna leh awmho dual dualna ang chi hi ka ngaina lo. Mi tam takin min hual vel hi hrehawm ka ti thin. Mi te nena inbiak hi harsat lo mah ila, ka awm mai maiin min en a, thla an lak loh leh video an lak te hian mi maksak leh danglam tak anga inngaihna ka nei thuai thin. Mihringah min ngai ve lo emaw ni chu aw… te ka ti thin.
“Tute tan pawh ka inhawng reng a, min be duh a nih chuan min rawn pan dawn nia. Han awmkhawm let let tawh chuan titi te pawh a chakawm nen, thlalak buai bawkin tawp kan khar leh thin hi a lem ka ti. Restaurant-ah ka chawl thin a, finrial hmun ka chan loh chuan ka thil ei laite min en du du a, sahuana awm ramsa angin ka inngai.
“Ka sawisel lam a ni lo. Hringnun duhawm tak ka hmang mek a, mahse, khatiang lam thil kha chu pumpelh hram ka duh,” tiin duhthawh takin a sawi.