Aizawl: Mizoram Pradesh Youth Congress Committee (MPYCC) chuan nimin khan an president Laltawnliana hovin Vairengte atanga Sairang inkar kawng chhia an enfiah.
Kawng an enfiahnaah MPYCC President Laltawnliana chuan Vairengte leh Sairang inkar kawng chu January-May thla chhung khan hmanhmawh zawka kawng siam hna thawk turin kawng siamtute tum thum an kawm tawh bakah Thawhlehni kalta atang khan pawl pathuma insiamin kawng siam hna thawh dan leh kawng chhia avanga harsatna thlen an zirchiang tawh tih a sawi.
Laltawnliana chuan ZPM sorkar hian lal hrim hrim tum avangin kum 15 daih kawng siam turin nasa takin an inzuar a, an sorkar hnuah thal vawi hnih thlen hnuah pawha an ngaihsak tawk loh avangin tunah mipui tawrhna a thleng tih a sawi a. Lirtheia eizawngtute leh he khawngpuiin a kal tlang khuate mangang tlawmngaia kawng siam hnatlang an nei fo pawh zak miah lova PWD minister-in, ‘kawng chhia hi mipuiin ka tihchhiat emaw an ti’ tia fiamthu zawnga a la zuite chu a thlangtu mipui palzutna dik tak a ni tih a sawi.
Congress thalai president chuan, “ZPM sorkarin September, 2024 – March, 2025 chhunga diesel leh petrol-a chhiah (cess 2%) chawi tira mipui a rawkna road maintenance cess atan chhiah Rs. 23,43,01,800 an khawn kha a awm? Motor pakhat bak a mamawh dawn lo titu ZPM chief minister khan tun hnaia motor thar leina atan a hmang ta em ni?” tiin a zawt.
Tun hnaia PWD Minister Vanlalhlana’n he kawng pawimawh, chhe lutuk a mawhphurhna ni lo anga a sawi hi thil zahthlak leh mawhphurhna hre miah lo a ni tih a chiang a. Mi dang kutah PWD department hi hlan se Mizoramin kan thatpui zawk ang. Tunah harsatna sutkian kawngah sorkar hian zah nachang hria se, sorkar kal tawh mawhpuha insawi thiam reng renga an term an hman zawh loh hramna turin hma la tawh rawh se,” a ti bawk.