Pawl pali hruaituten nimin khan NHIDCL Executive Director Virendra Kumar Jakhar chu a pisa-ah kawmin, Sairang leh Kawnpui inkar kawng siam chungchangah chiang zawk leh hna thawh an tum dan te zawt fiahin, tha tak leh rang takin, motor kal harsatna a awm lohna tura hma la turin ngenna leh hriattirna an pe.
Mizoram Transformation Movement (MTM), Centre for Environment and Social Justice (CESJ), Mizoram First (MF) leh Citizens Alliance for Truth & Social Justice (CATAJ) pawl aiawhte chuan Jakhar-a hnenah NHIDCL-in Mizorama a National Highway km 921 lai siama an enkawl mekah, Sairang leh Kawnpui inkar kawng dinhmun chhiat lutuk avanga motor hial a tluk thin thu leh kawng tha lo avanga Mizoram chhunga khawsak a buai thu an sawi a. Motor kal harsatna a awm lohna tura tha tak leh rang taka hma la turin ngenna leh hriattirna an pe a ni.
Pawl pali aiawhte hnenah NHIDCL executive director chuan kawng chhiat thu a hriat thu a sawi a, siam turin hma an lak mek thu leh theihtawk chhuah an tum thu pawh a sawi a. Amaherawhchu, fur ruahtui tlak chhung hi chuan black topping chu an tih theih rih dawn loh tur a sawi.
Mizoram PWD hnen atangin Khamrang leh Kawnpui inkar bakah Bilkhawthlir leh Kolasib inkar te hi an enkawl tura la mai tur an nih laiin, an la lak chiah loh thu a sawi a, lak thuai erawh an tum thu a sawi bawk.
NHIDCL executive director chuan kum rei tak chhung kawng siam kawnga harsatna an tawh zingah forest clearance an neih loh chu tunah chuan an neih tawh thu a sawi a. Amaherawhchu, thing dingte hi forest department-in an kih leh senghawi tur a nih avangin tun thlengin hna tak tak an la thawh theih loh thu a sawi.