Aizawl: BJP Mizoram State President Dr K Beichhua, MLA hovin Inrinni khan Sairang leh Khamrang inkar kawngpui dinhmun an enfiah.
BJP Mizoram hruaitute hian Mizoram chak lakna kawngpui pawimawh Nation Highway 06 huam chhunga NHIDCL enkawl km 77 leh Mizoram sorkar enkawl km 40 an enfiah a ni.
Kawng enfiahnaah BJP Mizoram State President Dr K Beichhua chuan NH 06 chu Mizoram chak lakluhna kawngpui pawimawh ber a ni chung a, lirthei tlan hleihtheih loh khawpa a chhia chu tha lo a tih thu a sawi a. NHIDCL-in an enkawl bik kawngte chu tun dinhmunah a ziaawm deuh a ngaihtheih a ni a, MPWD enkawllai bik erawh a tha lo hle thung a. Chutih rualin, Truck Owner Association leh pawl hrang hrangin nasa taka hma an la chung pawhin kawng dinhmun hi a la chhe hle a, ruah a sur anih chuan lirthei eng chi mah kal ngaihna awm lo khawpin a chhe leh thei tih a sawi.
Siaha bialtu MLA ni bawk Dr K Beichhua chuan, he kawngpui hi kumin March thla khan khatih laia BJP Mizoram State President Vanlalhmuaka hovin an tlawh tawh a, an kal hun khan khua a la tha a. Mahse, kawng siam nana sum awm kha a tlem tham em avangin kawng khuar zual lai hnawh nan boulder phah chauh anih vangin an duhthu a sam loh thu a sawi.
Hun rei tak Mizoram sorkarin a lo enkawl, km 40 huam chhung chu Mizoram sorkar leh NHIDCL te chuan vawiin hian Joint Survey neih an tum a, chumi hnuah NHIDCL te kuta hlan tum a nih thu leh Mizoram chakkhai lakluhna anih avangin NHIDCL te hnenah theihtawp chhuaha hma lo la tur leh harsatna an nei anih chuan a tul anga BJP Mizoram Headquarters te hnena lo thlen turin Dr K Beichhua chuan a chah a ni.
Hei mai bakah Inrinni tlai khan kawngpui chhiat zualna lai leh lirthei kal hleitheih lohnaah te khawl dah nghal turin thurawn a pe a. NHIDCL hotu te pawhin Dr K Beichhua rawtna anga an lo tih nghal tur thu an hrilh avangin lawmawm an tih thu an sawi.