Aizawl: Mizoram Presbyterian Kohhran chuan nimin, Pathianni khan Health Sunday & Hospital Sunday (Damdawi In Pathianni) an hmang. He ni pual hian Pathian biak inkhawmah hun hman a ni.
Health Sunday leh Hospital Sunday-ah hian chawhnu inkhawm hi Health Sunday puala hman a ni a, zan inkhawmah Hospital Sunday pualin thawhlawm lak khawm a ni. Hospital Charity Fund atan hman a ni ang.
Mizoram Presbyterian Kohhran chuan Health Sunday leh Hospital Sunday pual hian Synod Hospital-a damlo mi rethei leh harsa, damdawi ina awmna man pe thei lo leh pek tlak tur nei lote a peksak leh a ni.
Synod Hospital thuchhuah tarlan danin, Health Sunday leh Hospital Sunday pualin Synod hospital chuan damdawi-in awm man pe thei lo chhungkaw khawsak harsa te enkawlna senso a peksak thin a. Kum 2020 atanga kumin thlengin damlo 3,259 pek sak tawhin, heng zingah hian damlo 2,263 chu Presbyterian kohhran mi an ni a, damlo 996 chu kohhran dang mite an ni. Kumin June 30 thleng khan damlo 480 damdawi in awm man ba an la awm a, hei hi a vaiin Rs 2,03,59,678 a ni.
Mizoram Presbyterian Kohhran chuan Hospital Sunday hi kum 1928 atangin a hmang tan a, kum 1981 atangin July thla Pathianni hmasa ber hi Hospital Sunday atan hman tan a ni a. Kum 2008-a Synod-in ‘Health Sunday leh Hospital Sunday hi Pathianni vawi khatah a ruala hman ni se’ tia a rel angin kum 2010 atangin July Pathianni hmasa bera hman thin a ni ta a ni.
Kum Presbyterian kohhran Pawl Dang etc.
2020 – 2021 259 Rs 58,78,044 (66.67%) 150 – Rs 29,37,711 (33.33%)
2021 – 2022 403 Rs 84,29,350 (70.36%) 194 – Rs 35,49,811 (29.64%)
2022 – 2023 360 Rs 73,55,737 (68.72%) 148 – Rs 33,47,933 (31.28%)
2023 – 2024 615 Rs 1,52,94,206(70.14%) 248 – Rs 65,10,547 (29.85%)
2024 – 2025 626 Rs 1,36,75,102(69.65%) 256 – Rs 59,60,867 (30.35%)
Belh khawm 2263 Rs 5,06,32,394 (69.41%) 996 – Rs 2,23,06,869 (30.59%)