Tun hnaia zirchianna tihchhuah tharah kum 15 hnuailam raipuar chu kum hmasa aiin an tam tih tarlan a ni a, vei zui a ngai hle.
Kum tling lova inneih hi phal loh a ni a, dan hnuaiah phei chuan a him lo lehzual. Chutihrual erawh chuan kum tling lo, naupai an pung zel erawh vei zui a ngaiin, ngaihtuah a ngai hle.
Nu leh pate hian kan fate hi kan hmu puitling mawh viau a, inchhunga naupang chhe en leh chhaiha kan la chhaihte hi pawn lamah chuan an nunphung a danglam tak zet tih kan hriat a tul ta viau.
Kan hnam hian inthlahpun chu kan mamawh teh meuh mai a, kan tam pawh a tul hle. Mahse, mahni fate pawh enkawl zui thei lo leh humsual dai palh kan tam chho mek nia lang hi vei a tul a, inzirtirna kan uar thar lehzual a, tun atanga nu leh pate kan chet a ngai.
Fahrah leh bahvai tur ringawta nau neih hian a nghawng a na duh khawp mai. Tam tak chu an la naupan em avang hian nupui pasal neihtir zui chi an ni lo a, hei vang hian fahrah leh enkawltu mumal nei lo naupang an tam phah a, hei hian nu leh pa kara seilian lo thalai hring chho tam zelin, sualna leh ruihhlo kaihhnawih a thlen tam phah hle bawk.
Chhungkaw tin hian inzirtirna uar thar ila, kan hnam hma hun thlir chunga kohhran leh khawtlang hruaitute bakah sorkar thlenga kan chet chhuah a tul ta. Chhun thar turte hmakhua ngai chungin sex education thleng hian kan vei a, ruihhlo kaihhnawih hlauhawmnate pawh kan inzirtir nasat a va ngai ta em.