Indian Super League 2025-26 chu khelh theih loh dinhmunah a ding mek a. All India Football Federation (AIFF) hotute hian engtin nge hma an lak ang tih chu zawhna awm mek a ni a, khelh theih a nih chhan berten contract ziah belhpui tumna an la nei lo zel rih a, player leh football ngainatute ngaihven a hlawh mek zel.
ISL khelhna tur hian September 2, 2013 khan Football Sports Development Limited (FSDL) an tih chu din a ni a, anni hi AIFF nena tang dunin India-a football league sang ber hi an siam zui a, an sum thehchhuah hmanga kalpui a ni.
FSDL company hi Reliance Industries, International Management Group (IMG) leh Starsports tangkawpten an din a ni a. Reliance Industries hian chanpual 65% neiin Starsports hian 35% a nei ve thung a, an hotu ber chu Nita Ambani a ni.
AIFF hian ISL kalpui tur hian sum an nei lo a, FSDL rinchhan hian ISL an khel thei tihna a ni.
FSDL leh AIFF hian ISL atan hian kum 15 chhung inremna thuthlung, Master Rights Agreement (MRA) an tih chu an ziak a, he an inremna hi December 8, 2025 hian a tawp tawh dawn a, hei hi ziah belh a nih loh chuan AIFF tan inelna kalpui zui theihna sum an nei lo.
FSDL leh AIFF ten MRA an ziahah hian, “FSDL hian kum tin Rs, vaibelchhe 50 an pe ang a, ISL theh lar kawngah te, hlawkna hmuhna tura ruahmanna siam bakah he intihsiakna enkawl zel kawngah leh Indian national team thlenga thuneihna an nei ang,” tih a ni.
Inremna kal lai a tawp mai tawh dawn avangin a thar ziah tumna pawh a awm a; mahse, FSDL leh AIFF hi an thu a inhmu thei rih lo.
An inremna ziah theih loh chhan langsar pakhat chu ISL atanga sum lakluh insem kawngah lehlam lehlamin a hma aia chan tam an duh ve ve chu a ni a. ISL kalphunga thuneihna chan kawngah an thu a inhmu thei lo tel bawk.
ISL tana hmathlir an neihah FSDL leh AIFF ruahmanna a inpersan hle a. AIFF hian sum hmanga inremna awm tawh loin club 16 khelh theih tura kalpui an duh a, neitu nihna 20% chan ve an duh chu FSDL hian an pawm thei lo.
FSDL hian ISL club hotute leh AIFF aiawhte bakah anmahni aiawhte telin ISL enkawltu tur company hran din an duh ve thung.
Hengte a nih avang hian MRA hi an ziak thei ang em tih a la chiang lo zel a. ISL hi a tawp mai dawn nge AIFF hian a kaw tawpah tangin FSDL duh dan leh ruahmanna a pawm mai dawn nge, ISL kalpui hram dan tur a ngaihtuah dawn tih sawi theih a ni rih lo.
Indian football ngainatu tam tak chuan AIFF hi thiat se, FSDL hian enkawl vek se tia tawng chhuak pawh an awm tawh.