Minerva Academy FC chu Helsinki Cup 2025 khelh mekah an che tha hle a, round of 32 an khelhah an khelhpui Finland club GrIFK chu 7-0 ngawtin an hneh.
Group stage-ah pawh Minerva hi an che tha hle a, vawi li an khelhah an chak vek a, goal 24 ngawt an thun a, goal an chhuah miah lo bawk.
GrIFK hi Finland-a club lian ve tak an ni a, footballer tha tak tak an lo chher chhuak teuh tawh a. Kum 1925-a din kha niin, an club hian an rama thalai chher chhuah kawngah sulhnu an nei tha hle a, an larpui em em bawk a. Technical lama tha tak, discipline pawh tha, grassroots kalphung tha zet nei tia sawi an ni a, chuti chung chuan Minerva lakah chuan an che thei meuh lo.
An inkhelh tirh atangin Minerva chuan inkhel an thunun nghal hle a, ball pawh an chang hnem zawk daih a. Game rang tak an khel a, an passing a dik viau bawk a, hetianga an khelh avang hian an khingpuite chu an che hleithei lo hle.
Raj chuan he inkhelah hian hattrick a siam a, box chhunga ball a luhpui tawh chuan GrIFK defender te an che buai zo vek thin a. Chetan pawhin goal tha zet mai thunin, Yohenba goal thun a mawi hle a. Rajesh leh Reesan te pawhin Minerva tan hian goal khat ve ve an thun bawk.
An chak hian Minerva chuan vawi nga khelhah goal 31 zet thunin goal an la chhuah miah lo a. Group stage-ah khan point 12 an hmu thei a, a chungnung ber an ni chiang hle a. An group-ah khan Iceland club pahnih KR leh Afturelding te bakah Finland club pahnih, HJK/2 leh LoPa te nen an awm a ni.
Minerva Academy FC tlarhnung an khawng hle a, midfield lam pawhin an nawr na thei viau bawk a, forward ho lahin hun tha an neih chu an hmang tangkai deuh zel bawk a ni.
Round of 16 an thleng ta a, mi rin loh pawl chu an ni ta bik hauh lo a, champion tura rin kai zingah an tel thei hial tawh a. Tournament neihna Helsinki khawpuiah Minerva hming chu hmun tinah a ri ve ta a ni.