Premier League tan nan thla khat chauh hun a awm tawh a, striker langsar tak tak hming a ri nasa a, insawn dawn nge, an insawnna tur la chiang lo an tam hle.

Chelsea chuan Ipswich atangin Liam Delap leh Brighton atangin Joao Pedro an lei fel tawh a. Hetih lai hian Newcastle, Liverpool, Manchester United leh Arsenal chuan hmatawng an la dap zel.

Club-ten player hrang hrang an thlithlai a, duh inang club pawh an awm a, engmah chiang a awm rih lo.

Viktor Gyokeres (Sporting)

Sporting striker hi tun nipuiah club tam takin an zui nasa a, hetih lai hian kum 27 mi Coventry player hlui hi bazarah a awm tawh lo mai thei.

Portugal-a a awm chhunga vawi 102 khelha goal 87 thuntu hi Arsenal-in £ maktaduai 63.5-in Sweden forward hi an la lut hnai.

Gunners hian ngawrh takin an umzuii a, Gyokeres-a pawhin zawm a duh niin a lang bawk a, lei theih loh a ni tep.

Victor Osimhen (Napoli)

Nigeria striker hi Arsenal, Manchester United leh Chelsea te nen sawi zawm an ni a; mahse, ani pawh bazarah a awm tawh lo hnai thei tho.

A neitu, Napoli chu season liam taa loan-a a khelhna, Turkish club Galatasaray nen an indawr mek a, Turkey-a kir leh a hnaih niin ka hria.

2022-23 season khan kum 26 mi hian Napoli chu kum 1990 khan Italian nomawi a lakpui a. Season liam taah erawh Galatasaray chu a champion zo lo chiah chiah thung.

Alexander Isak (Newcastle United)

Newcastle chuan Isak hi zawrh lai a ni lo tih an sawi thin a; mahse, heti ngawt hian a ni lo mai thei.

Liverpool chuan kum 25 mi Sweden forward hi an um zui mek a; mahse, an lak dawn chuan British-a inleina to bera an lei a ngai dawn.

Isak-a man hi £ maktaduai 130 tal ni tura ngaih a ni a, Liverpool hian Hugo Ekitike lak tumin an bei bawk a, Magpies hi an dawr zui lo thei tho.

Hugo Ekitike (Eintracht Frankfurt)

Liverpool-in Ekitike hi lak tuma beiin kartawpah hian an lak luh theih a beiseiawm.

Newcastle pawhin kum 23 mi Frenchman hi an dawr a, £ maktaduai 70-a lak tuma an biakna chu hnawl an ni tawh thung.

Chelsea chu amah zuitu dang an ni a; mahse, Delap leh Joao Pedro an la tawh a, hmatawng dang an ngaihven zui a rinawm ta chiah lo.

Ekitike hian season liam ta khan Frankfurt tan goal 15 thunin mi dang thun tur vawi riat a siamsak a, goal a thun hnem ber season niin Bundesliga-ah pathumna a nihpui a, Champions League khel phakah a hung chhuak.