Aizawl: Vaivakawn veng chhunga ruihhlo ngai pungkhawm nasa thin then thianghlim dan tur ruahmanna siamin nimin khan Excise & Narcotics Department Minister Lalnghinglova Hmar hovin Vaivakawn Siamtha Pawl (VSP) hotute an thukhawm.
Excise minister pisa-a thutkhawmah hian ruihhlo ngaite leh zu in miten Vaivakawn veng chu kalkhawmna leh riahkhawmna tura an ngai a, an pungkhawm thin chu tha an ti lo va, nunau leh khawtlang tana a him loh avangin titawp tura thian thianghlim turin Excise & Narcotics Department leh Vaivakawn Siamtha Pawl te chu thawhho an rel.
Hmalakna hmasa atan excise minister chuan VSP hnenah pawisa fai Rs 20,000 a pe a ni.
Thutkhawmah hian Excise & Narcotics Commissioner Z. Lalhmangaiha chuan zirchianna an buatsaihah, ruihhlo ngai zinga zaa 80 vel chu mahni chenna in nei, mahse ruih duh vanga Vaivakawn leh a chhehvela kalkhawm an ni tih a sawi a. Kalkhawm thin zingah hian TBCC atanga chhuak chu zaa 60 vel an ni a, Hulhliap Project atanga chhuak chu zaa panga vel niin, a bak chu hmun dang atanga kalkhawm an nih thu a sawi a. Department lamin theihtawp an chhuah a, tlaivarin Aizawl khawpui chhungah mobile duty an neih thin thu a sawi bawk.
VSP hian Aizawl veng hrang hrang bakah khaw dang atanga ruihhlo ngaiten Vaivakawn an pan khawm thin a. An punkhawm tam lai chuan mi 200 chuang tling thinin khawlai hmun ualau tak taka inchiu te an awm fo avangin nunau tan a him lo va, rukruk leh inrawk pungin biak in, anganwadi, YMA property house bakah mi mal in eng emaw zat rawk a ni tawh a ni. Pawl hrang hrangin eitur an pe thin chuan ruihhlo ngai pungkhawm a tih tam phah tih sawiin, ei tur pe tur chuan hriattir hmasa thin turin thuchhuah an lo siam tawh a ni.