Aizawl: Excise & Narcotics Department (END) chuan Methamphetamine an man.
Inrinni zan zan dar 11:10 khan END chuan Champhai district, Zokhawthar khaw panna bul, New Hruaikawn Road-ah Methamphetamine Kg 10 & Gram 100 (Tablet 10,100) leh a neitu nia puh – Lunminlalzo (34), Churachandpur, Manipur, tuna Champhai Vengthara khawsa mek nia inchhal an man.
Methamphetamine phurhna atana a hman lirthei, Maruti 800 car (MZ04 – 8564) pawh hrensak nghal a ni.
Pathianni zing dar 8:45 khan Champhai, Mualbawk-ah heng methamphetamine tawlh ruknaa inhnamhnawiha puh – Christy Hmingthanzami (19), Champhai Vengthar-a khawsa nia inchhal pawh an man tel bawk.
Heng Methamphetamine te hi state pawna hralh tur nia rin a ni.
Methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, July ni 20, 2025 khan Court-ah hruai nghal an ni. Court-in thiam loh a chantir chuan kum 10 atanga kum 20 thleng jail-a tantir leh pawisa Rs 1,00,000 atanga Rs 2,00,000 thleng chawia tel bawka hrem theih an ni.
END chuan tun lai hian Aizawl mai bakah district capital hrang hrangah chhun leh zanah ruihhlo ngaite vaiin beihpui an thlak a. Ruihhlo ngaite thahnem tak hruaikhawmin an zilh thin a, an chhungte remtihna lak hnuah home hrang hrangah te an dah a, thenkhatte chu court thupek angin vantlang hmun pawimawh then faitir an ni a. Hei bakah, tunlaia sorkarin ruihhlo ngaite puala enkawlna a buatsaih, Hulhliap Short Stay Centre for Addicts-ah te dah an ni nual bawk.