LPS Vision-in Mizo Talent a buatsaih tura endiktu (judge) tur palite chu hriat kim tawh niin, an zingah hian Mizo zinga huhang ngah, comedian H. Rotluanga (Mapuia) a tel dawn.
Zai mi, lam thiam, rimawi tum thiam, magician leh acrobatic lama tuite inpho chhuahna tur ‘Mizo Talent’ a judge dangte chu Youth Icon judge pahnih Victor Vanlalhruaia leh Rosy K. Remsangpuii bakah, lam thiam leh heti lama endiktua lo tang fo tawh Nutei Pautu te an ni dawn.
A stage name Mapuia tia hriat lar H. Rotluanga hi Mizorama TV reality show ngaihhlut hlawh Comedian Search hlawhtlinpui em em tu niin, Mizo comedian tam tak chher chhuak tawh a ni a, Zephyr Drama Club hotupa a ni bawk.
Youtube lamah pawh FTH Official channel neiin, show leh ennawm hlawhtling tak tak kalpui mektu a ni bawk a ni.
Mizo Talent-a judge turte hi an theihna zawn theuha mite hriat hlawh tak tak an nih avangin show pawh a hmuhnawm zual ngeiin a rinawm.
Mizo Talent hi August ni 5, 2025 a tan tur niin, entry form a lak theih mek a, July ni 26 hmaa thehluh leh hman tur niin, LPS office, Zarkawt bakah LPS Official Facebook page-ah PDF hmanga download theih a ni bawk.
Mizo Talent-ah hian zai mite tan a tel theih a, mal zai emaw, zaipawl emaw, a huho (group/band) ang pawhin tel theih a ni. Lam thiam tan pawh mimal leh a huhoa tel theih ni bawkin, rimawi hmanraw chi hrang hrang tum thiamte tan a tel theih a, category dang, magic leh acrobatic pawh a awm bawk.
Mizo Talent-ah hian pakhatnain Rs 2,00,000 a dawng ang a, Top 3 zinga mi pahnihin Rs 50,000 ve ve an dawng ang a, Top-10 a inhlang kai, Top 3 ni pha lo mi pasarihte pawhin Rs 10,000 theuh an hlawh dawn a ni.