India-a eptu tangrual, INDIA chuan Inrinni khan ral atanga thutkhawm huaihawtin parliament fur thutkhawm lo awm tura an sawiho va. Sawi chhuah tura an duh thilte leh an ngaimawh zawngte an sawi.
Communist Party of India (CPI) hruaitu, D Raja chuan thutkhawmah hian Congress MP Rahul Gandhi-a’n Kerala-a Left-te thil kalpui dan a sawina leh BJP-a an ngaihdan siamnaa mawhphurtu ber, RSS nena a tehkhinna chu a hnawl a. An hruaitu lawkte nen thawhpuite kal dan sawiselna chu sawihovin kal zel dan tur an ngaihtuah dawn tih a sawi nghal.
Shiv Sena (UBT) hruaitu, Uddhav Thackeray, NCP (SP) hruaitu Sharad Pawar leh Ram Gopal Yadav te chuan hetiang thutkhawm hi neih fo tha an tih thu an sawi a. August thla tur lamah INDIA tanghote hi inhmuh khawm leh ni se an ti.
Jammu & Kashmir Chief Minister Omar Abdullah chuan parliament thutkhawmah hian an union territory-in state nihna an neih theihna tur chu an sawi chhuak ngei tur thu a sawi a. Mi dangte pawhin pawmpuiin Pahalgam-a firfiaka chetna pawh sawi chhuah an tum.
Dipankar Bhattacharya-a chuan sorkar laipuiin Maoist do beihpui a thlak mek chu sawi chhuah ni se a ti a, Maoist-ten inkahhai an duhna pawh sawi rik ni se a ti.
Trinamool Congress hruaitu, Abhishek Banerjee-a chuan Pahalgam-a beihna thleng khan intelligence hlawhchhamna a nih chuan engvanga Intelligence Bureau chief chu a hun pawhseisak nge a nih zawh ni se a ti a.
Inrinnia an thutkhawmah hian INDIA-a tel party 24 aiawhte an tel a. Aam Aadmi Party (AAP) erawh inlan lovin tun hnaia an chet danah chhuahsan tumna an nei niin a lang.
Congress chief Mallikarjun Kharge, Congress chairperson Sonia Gandhi, Lok Sabha Leader of Opposition Gandhi, RJD hruaitu Tejashwi Yadav leh Jharkhand Chief Minister Hemant Soren te pawh an tel.
An thutkhawm zawhah Congress hruaitu, Rajya Sabha Deputy Leader ni mek, Pramod Tiwari-a chuan ram himna atan chuan an inlungrual tlang a, BJP rorelna chu hetiang kawngah chuan an thlawp zep tur thu a sawi.
Hetih lai hian US President Donald Trump-a’n India leh Pakistan inkahhai a awm theih nana a thawh rah anga a sawina chu INDIA chuan hriat chian an duh tih a sawi a. American hruaitu hian a inrawlhna vang ngei a ni tih vawi 24 a sawi tawh laiin Prime Minister Narendra Modi-a chu a ngawi tlat niin a sawi.
Tiwari-a chuan thutkhawm lo awm turah hian INDIA tanghote chuan Bihar-a SIR kalpui pawh an sawi chhuak ngei dawn tih a sawi bawk.
Parliament fur thutkhawm hi Thawhtanni atanga tan tur niin August 21 thleng a awh dawn a, thutkhawm vawi 21 awm tura ruahman a ni.