PWD Minister Vanlalhlana chuan Mamit leh Bairabi inkara kalkawng siam mek chu Inrinni khan a hmunah enfiah.
Kawng a enfiahnaah Vanlalhlana chuan, Mamit leh Bairabi inkar kawng chu Mizoram district pahnih inkalpawhna leh ei leh bar chawk luhna kalkawng pawimawh tak pakhat nih avangin, thawm that ngai laite thawm that vat a tul tih a sawi a. Chak zawka he lai kawng hi siam a nih theih nan sorkar chuan hma a lak thu a sawi bawk.
PWD Minister hian Bairabi khaw chhunga NIDHI Creative Infrastructure Private Limited in nikum atanga 4-Lane National Highway siama kawngpui zauh hna a thawh mek chu enfiahin, Land Owner’s Association-te nen inkawmna a nei nghal a. He hunah hian khaw chhung kawng siam meka harsatna awmte sutkian dan turte sawiho a nih bakah, zangnadawmna chungchanga harsatna awmte chak zawka chinfel dan tur an sawiho bawk.
Vanlalhlana hian Bairabi-a Food Corporation of India (FCI) Go-down chu tlawh bawkin, thawktute kawmna a neih zawhah Rail Station hmunhmate tlawhna nei nghalin rel kawng siam tharte bakah, Bairabi atanga Aizawl panna kalkawng National Highway 06 dinhmun pawh a enfiah bawk.