Youth Icon superstar J Lalrosanga (RSa) chuan lengzem kalsanin Pathian hla chauh a sa tawh dawn.
RS-a hian lengzem kalsanin Pathian fakna hla chauh sa tawh turin US-ah thutlukna a siam fel tawh a. Tuna a cham mekna US-ah pawh Pathian hla chauh a sa tawh.
US dollar 1,000 hlawha a hla hit — Fuh Chiang Lo Maw — sa tura an request pawh a hnar thak. US dollar 1,000 hi India pawisain chantir mah teh u!
US a pan hma, hun eng emaw chen atang khan lengzem kalsana gospel chauh sa tawh turin a rilruah mawlhtu a lo nei lian tawh reng thin. A tawp a tawpah gospel lamah tlu lut ve rawih turin, ‘Pathianin min ko a nih hi…’ tih lam hawia a rilrua kohna lian lam zawk chu a pan ta zawk a. US-a a awm laiin thutlukna a siam fel tih, tuna US-a cham mek RS-a chuan Thalai Times a hrilh.
RS-a hi tuna a khualzinna ramah lengzem sa tura sawm a ni. Mahse, gospel hla chauh sa tawh tura thutlukna a siam fel tawh avangin, lengzem concert zawng zawng pawh gospel concert-ah an thlaksak vek tih a sawi bawk.
Hetih lai hian, Youth Icon star hian lengzem khawvel thlahna’n, a love song music video hnuhnung ber tur tihchhuah a tum a. Tunah hian a hla tihchhuah tur hi recording leh shooting pawh an ti zo vek tawh a, a YouTube channel-a upload theih reng a ni tawh nghe nghe.
Youth Icon star hian, lengzem kalsana gospel huanga a zuan luh hma hian, Icon intihsiak laia a hla hman thiam leh a zai ngainatute ‘Fuhchiangtea’ an tih phahna, thla sarih kaltaa — Fuh Chiang Lo Maw — music video a tihchhuah bak hi tun dinhmunah official music video a nei rih lo. He music video hian tunah hian maktaduai 4.1 thlirtu a nei tling tawh a ni.