Aizawl: MPYCC chuan kum 15 daih kawng siam tura inzuarten mipui harsatna chin fel aia an taksa siam danglam leh huau huau lama hun an khawhral zawk zel avangin Mizoramin harsatna namen lo a tawk tih an sawi.
Inrinnia thuchhuah an siamah Congress |halai chuan, July 19, 2025 atanga kawng chhe lutuk avanga Mizoram Oil Tanker Drivers Association te nawrh an huaihawt ta chu pawi an tih thu an tar lang a. Mizoramin thusawi thiam leh thil dik lo sawi mam thiam aia a taka hlenchhuak thei leh innghahna tlak sorkar a mamawhzia tichiangah a ngaih thu an sawi.
MPYCC chuan ZPM sorkar chu ‘kan ti ang’ an tih aia ‘kan ti ve lo vang’ tih zawng zawng an tihhlawhtlin zawk zelah puhin, hei vang hian Mizoramin kawng hrang hrangin harsatna a tawk tih an sawi a. Kawng chhia avangin lirthei tam tak khaw kar kawngah an tangkhang mek laia, a changtu PWD minister chuan kawng chhe siam thatna lam aiin nuamtawla lamah a insawrbing zawk chu thil zahthlak leh kohhran mitmei zah lohnaah an ngaih thu an sawi bawk.
Congress |halai chuan kum 2022 Assembly thutkhawma mi mal lirthei khalhtute leh enkawltute hmakhawngai taka driver-te hamthatna tura private member bill, ‘Mizoram Private Transport Workers (Welfare) Bill, 2022’ pu luttu, Education Minister Dr. Vanlalthlana chu tuna a tithei zawk dinhmuna an din tawh hnuah engmah driver-te hamthatna leh an dinhmun ngaihtuaha an harsatna ching fel tura thawm engmah nei lova a ngawi reng hi mak an tih thu leh, ruling a nih hnuah driver te a veina chu a bo tawhah an ngaih thu an sawi.