Ukraine chuan Russia nena an inkara inremna a awm theihna turin rawtna thar a siam leh niin President Volodymyr Zelensky-a chuan a sawi a, hei hi thla hmasaa an inbiak hnua indawrna awm zui ta lo chhunzawmna tura an ruahman a ni.
Ukrainian security official Rustem Umerov-a chuan tun kar hian Russian lamte biak leh a tum niin Zelensky-a chuan Inrinni zan khan a sawi a, anni lamah chuan inkahhai kalpuina turin engkim an ruahman fel vek niin a sawi bawk.
Zelenksy-a hian hmaichhana Russian President Vladimir Putin-a nena inbiak pawh a inpeih reng tih a sawi nawn leh a. “Muanna tak tak a awm theih nan hian hruaitu level-a inkawm hi a tul a ni,” a ti.
Kyiv-in inbe tura rawtna a neih a puan hma lawk hian Russia chuan tha tharin van sang atangin Ukraine hi a bei leh chiam a, mi pathum an thi.
Zirtawpni zan leh Inrinni tuk khaw var hma thleng khan Ukraine-a region 10-a khawpui lian tak tak beih a ni tih Zelensky-a chuan Inrinni tuk khan a sawi.
Ukrainian sipaite chuan tuak phei 340 chuang leh cruise leh ballistic missile 35 hmanga kah an nih thu an sawi a; mahse, tam tak chu pawi an khawih hmain an ching fel tih an sawi.
Kar liam ta tir lamah khan President Donald Trump-a chuan US-in Nato kaltlangin Ukraine hi ‘ralthuam tha ber ber’ a thawn dawn tih a sawi a, hetih rual hian ni 50 chhungin Russia-in indona titawp tura inremna a siam lo a nih chuan sumdawnna thilah na takin a hrek dawn tih a sawi bawk.
Trump-a hian US chuan hun tiam chhunga Ukraine nena inremna a siam lo a nih chuan Russia-in a sumdawnpui ramte lakah tariff 100%-a sangin lakah a vau tel a ni.
Moscow leh Kyiv hi Istanbul-ah vawi hnih an inbe tawh a; mahse, inkahhai puang tura inremna erawh an nei thei lo va. Mi tang leh sipai an inthahsakte ruang inthleng tur erawh chuan an inrem thei thung.
June thla tir an a inbiakna hnuhnung zawkah khan Ukrainian aiawhte chuan Kyiv leh Europe-a an thawhpui leh US duh ber, ‘tiamchin awm lova inkahhai’ chu Russia hian a hnawl niin an sawi.
Russia pawhin inbiaknaah hian thil phut tam tak a nei ve tho va, heng zingah hian Ukraine-in a ram eng emaw zat an hlan leh khawthlang ramten sipai thila a puihna tihtawp vek pawh a tel.
Hetih lai hian Zelensky-a hian Moscow chu ‘inbiakna awm leh tur pawh engmah a nih lohna turin a tih theih dan danin a ti’ niin a sawi hial.
Tar lan tawh thin angin Russian President Putin-a hian February, 2022 atang khan Ukraine a rûn a. Kum 2014-a Crimea peninsula chhim lam a luahsak telin Ukraine ram 20% chuang an thunun mek.