Aizawl: Khawvel hmun hrang hranga cheng Mizote inthlunkhawmna tur internet portal thar Mizo Diaspora Hub tih chu nimin khan Chief Minister Lalduhoma’n a hawng.
RB McCabe Hall, Aijal Club-a hawnna inkhawmah chief minister chuan khawvel ram hrang hranga awm, Zofate nena inthlunzawmna tha neih hi an rilruah a thi thei lo va. An sorkar ve leh chu mi lam hna thawktu tur Mizo Diaspora Cell chu Chief Minister Office-ah an din a, a tir lamah ram pawna tangkhang tanpui ngaite an theih ang angin an tanpui a. Inthlunkhawmna lam an buaipui leh a, chu an hmalakna rah duhawm tak chu Mizo DiasporaHub tiin an hawng thei ta tih a sawi.
Chief Minister chuan welfare/association te’n tangkai taka portal hmang tur leh registration ti vek tura chahin, “Inhretawnin awm ila kan duh a, tanpui kan ngaihnaah kan thawk dun ang a, sorkar thilte kan inhrilh hre bawk ang a. A bik takin an awmna rama harsatna tawk, sorkar inrawlh a tulna thilah a tangkai zual ang. He app-ah hian welfare ten an inrelbawlna lama an tangkaipui theih tura ngaih thil kan dah tel a. Hei hi welfare-te thuneihna va chuhpui emaw va nekna atana siam a ni lem lo va, an awlsamna tur siamsakna zawk a ni,” a ti.
Diaspora Cell Chairman Vanlaldina Fanai sawi danin, Mizo DiasporaHub-ah tunah hian welfare/association tan registration an hawng mek a, he mi zawh hian mi mal registration an hawng leh dawn a. He portal hmang hian miin a va vahchhuahna hnaivaia Mizo Welfare lo awm te awlsam takin a hre thei dawn a; an inkhawmna hmunte, an pawl hruaitute contact pawh a hre thei ang. AI hmanga thuam a ni a, zawhna pawh zawh theih a ni. Eng emaw rikrum thila thu inthawnna tur SOS chenin dah a ni.
Portal hi LushAITech ten an siam niin an enkawl chhunzawm dawn a. Portal hi play store leh apps store atanga download theih a ni a. Website atanga luh theih a ni bawk.
Hawnna inkhawmah ICT Minister Dr. Vanlalthlana, Social Welfare Minister Lalrinpuii, LESDE Minister Lalnghinglova Hmar bakah Adviser to CM te pawh an tel.