Aizawl: Ruihhlo ngaite chhanchhuah nana buatsaih Hulhliap Short Stay Centre thawh hnihna chu nimin atangin kalpui tan leh a ni. Mi 150 awmna tura ruahmanah mi 550 vel an lut.
Hulhliap Core Committee hnuaia Task group on Public Relations hotute hnen atanga thudawn danin, Hulhliap thawhnihna a lut turte hi nimin chawhma dar 9 bawr vel atang khan Synod Revival Camping Centre, Sihphir Neihbawi-ah an in ziak lut tan a, Aizawl chhung atanga lut turte chu Central YMA Office, Tuikhuahtlang leh Bawngkawn YMA Hall-ah in nghak khawmin, Camping centre hi a huhoa pan pui an ni a, Aizawl district pawn atangin mi thahnem tak chu Centre-a lut tur hian an in ziak lut bawk.
Ruahman dan chuan batch tinah hian mi 150 zel enkawl tura tih a ni a, hetihlai hian Hulhliap thawh hnihnaa lut tur inziak lut hi an thahnem hle a, nimin tlai dar 5:30 vel thleng khan mi 550 an inziak lut tawh nia thudawn a ni. A thawh khatnaah pawh khan a tirah mi 250 vel camp-ah an lut a, awm tluan erawh mi 119 an ni thung.
Hulhliap Short Stay Centre thawhhnihna hi ni 20 chhung (July ni 21 atanga August ni 9) kalpui tura ruahman a ni a, Camper-te chu July ni 21 atanga ni 30 thleng an taksa in ruihhlo a mamawhna zualpui phuhruk thei turin damdawi lam thiamna hmangin enkawl an ni ang a; July ni 30 atanga August ni 3 thleng rilru lam enkawl thiam ten Counselling an nei pui leh ang a, hemi hnuah Synod Revival hnuai Gospel team ten August ni 9 thleng Gospel Camping neih pui leh tura ruahman a ni bawk.
Hulhliap Short Stay Centre hi Mizoram sorkar, tlawmngai pawl leh kohhran tangkawpin an buatsaih a ni a, nakkum March thla thleng kalpui tura ruahman niin, Synod Revival Camping Centre, Neihbawi-ah Camping hi kalpui thin a ni.
A thawh khatnaah khan mipa leh hmeichhia enkawl an ni a, a thawh hnihna erawh damdawi hmang sual mipa hlang tana buatsaih a ni a, batch dangah zu avanga tal buai leh ruihhlo ngai hmeichhia te enkawl zel tum a ni.