Iranian thuneitute chuan khaw lum uchuak takin an ram a nuai mek karah tui indaih lohna a thlen mai hlauvin mipuite chu tui ren turin an ngen.
An ram meteorological service chuan Iran-ah hian kar liam ta kha kumina a lum ber chawlhkar nia sawiin hmun thenkhatah chuan 50°C pawh a kai niin an sawi.
Sorkar thupuangtu, Fatemeh Mohajerani-i chuan Pathianni khan Tehran province-ah chuan Nilaini hian khaw lum uchuak tak avangin chawlh an puang dawn tih X-ah a tar lang.
“Khaw lum tak leh tui leh electricity renchem a ngaih avang hian Nilainiah chuan Tehran province-ah chuan chawlh a ni ang,” tiin a tar lang.
Pathianni pawh khan Tehran-ah hian 40°C kaiin Thawhtanniah 41°C a kai bawk niin an sawi.
Iran-ah hian tui hi a vâng sa a, a bikin an ram chhim lama ruah tui dawng tlem province-ah an indaih lo nasa zual a. Hei hi a enkawlna a mumal loh vang leh lei hnuaia thil hlu awmte hai chhuak tura beih nasat lutuk vangah puh a ni a, sik leh sa inthlak nasain a nghawng bawk nia sawi a ni.
Tehran City Council chair Mehdi Chamran chuan mipuite chu ‘a tul lova luan raltir lova ren turin’ a ti niin ISNA news agency chuan a tar lang.
An ram chhung hmun dangah pawh thuneituten tun hnaiah hetiang ngenna hi an chhuah hlawm a, province eng emaw zata chengte chu tui hman zat tur bi tuksak hial an ni.
Tehran province-a water management company chuan tui hman thin 20%-a tihtlem theuh chuan tui indaih lohna thleng tur a veng thei dawn niin a sawi.
Thuchhuah an siamah ‘Tehran chawmtu tuikhuahte chu kum zabi khat chhunga a kâm lai ber an ni hlawm’ tih an sawi a, a hma kum eng emaw zat liam ta atanga ruahtui an dawn tlem vang ni pakhatah an ngai.
Inrinni khan khuarel humhalhna lam chanchinbu, Javan chuan thuneituten khawpui chhung hmun thenkhatah tui indaih lo tur ven nan tui an pek thin an titlem tih an tar lang a, hei vang hian hmun thenkhatah chuan ‘darkar 12 atanga 18 inkar vel tui nghei’ an awm tih an sawi.
Energy Minister Abbas Aliabadi chuan Pathianni khan tui pek an titlem chu hriat thiamna dilin ‘insemzai a ngaih avanga ti an ni’ tih a sawi.