Kan chak lakna kawngpuite hi a tha mawh viau a, lirthei neitute tan tlan ngaihna thlawt a awm tawh loh avangin tunah hian pawl hrang hrangin din an huaihawt a, an lirtheite an dintir ta ta hial mai.
Oil phurtuten tlan ngam a ni tawh lova hriain din an rel a, hmun hrang hrang pawhtu kawngpui a chhiat em avangin hmun hrang hrangah lirthei an tlan lo chho zeuh zeuh ta.
Ruahtui tla a la reh fel lo a, ruah a la sur leh fo thin avangin leimin a awm leh zeuh zeuh thin bawk nen. Lirthei hmanga eizawng leh zin veivakte an khawngaihthlak thin hle.
Sorkar in chet lak thuai thuai a tum miau loh avangin Sairang atanga Vairengte kawnga tlan thin tan tlan ngam a ni tawh lo a, mimal tlawmngaiten kawng siam ve bawk thin mah se a raptu an tam em avangin a tha rei thei tak tak lo a, oil phurtute tlan loh avangin khawpui chhunga pump hrang hrangah lirthei oil la tur intlar an tam thin hle.
Mamit district chhunga Tripura lam nena kal inkalpawhna kawngpui hrang hrang pawh tlan ngam a ni tawh rih lo a, leimin leh lei tla bal avangin zawh ngam a ni lo a, Tuidam leh Darlak inkar kawng phei chuan ngaihsaktu a nei lo!
Sorkar hian hmingthat an duh a nih chuan thil har hi chu a ni lo mawle….kawngpui siamthat lamah hian thangharh se, tui leh eng min pe tha se, mipui lungawina siam hi chu har lo asin.