Prime Minister Narendra Modi-a chuan Nilaini atang hian UK leh Maldives a tlawh dawn a, Inrinniah a lo haw dawn tih Pathianni khan Ministry of External Affairs (MEA)-in a puang.
Modi-a hian Prime Minister Keir Starmer-a sawmna angin UK hi a tlawh dawn a. MEA chuan tun hi prime minister-in UK a tlawh vawi lina tur a nih thu a sawi.
A cham chhungin Modi-a hian UK prime minister hi India-UK inkungkaihna thil chi hrang hrang zau takin a sawipui dawn a. “Ram pahnih inkar thil bakah khawvel huap thil pawimawha an thlir dante an sawi dun dawn a ni,” tiin MEA chuan thu a chhuah.
Modi-a hian Sir Keir bakah King Charles III pawh a kawm ang.
“Hruaitu pahnihte hian sumdawnna leh eibar, technology, thil thar chin chhiah, ram venhimna, sik leh sa, hriselna, zirna leh mi chengte inpawh tawnna thila Comprehensive Strategic Partnership (CSP) kalpui mek pawh a thlen chin an thlir dun ang,” tiin MEA chuan a tar lang.
UK atang hian Prime Minister Modi-a hian President Dr. Mohamed Muizzu-a’n a sawm angin Zirtawpni leh Inrinniah Maldives a tlawh haw ang a. “Prime minister-in Maldives a tlawh vawi thumna tur leh Maldives-a Dr. Mohamed Muizzu-a president a nih hnua a vawi khat zinna tur a ni,” tiin MEA chuan a sawi.
Modi-a hi Inrinnia Maldives-in an ram indan champha kum 60-na an lawmnaah khual zahawm a ni ang.
Independence Day lawmnaa khual zahawm a nih dawn bakah hian Modi-a hi Dr Muizzu-a nen inbiain ram pahnih inkungkaihna thilte an sawi dun ang.
MEA-in a tar lan dan chuan hruaitu pahnihte hian October, 2024-a Maldives president-in India a tlawh tuma an siam, India-Maldives Joint Vision hnuaia ‘Comprehensive Economic & Maritime Security Partnership’ an neih mek thlen tawh chinte an sawi dun dawn a ni.
MEA-in thuchhuah a siamah chuan prime minister-in Maldives a tlawh tur hi India-in tuipuia a thenawmte a ngaih pawimawhzia tihlanna leh ‘Thenawm ngaih pawimawh hmasak’ tih thupui neia a kalna a nih thu tar lan a ni a. Modi-a’n a tlawh tur hian ram pahnih inkar inkungkaihna pawh a tihthuka a tihngheh lehzual beisei a ni tih tar lan a ni.