- Dr. C. Lalrampana
A KAMKÊUNA
Mizoram hi a manganthlak takzet ta! Mizo District Council, Lushai Hills Autonomous District Council, 1952 kan nih atangin kum 73 a liam tawh a, kum 20 chhung ADC kan ni a, kum 15 UT kan ni a, kum 38 State puitling niin hun kan hmangleh mek. Kum 73 chhung khan political party hrang hrang panga MU; INC; PC; MNF; ZPM kan hrawn tawhin kan hrawn mek. Mahse, vawiin thlengin state sawngnawi ber leh intodelh lo ber kan ni. Mipui hmaa thutiam ngah, a taka tihpuitlin tlem si an la ni chho zel mai. “A hun ngaihtuah zawngin zirtirtu ni tawh hial awm in ni na a, Pathian thu bul ber A Aw B-te chu zirtir in ngaileh ta a, chaw rum ni lova hnute la ngai mi ang in lo nih tak hi!” tih bak dinhmun hi kan pel theih meuh lo chu a ni e.
MIZORAM CM-TE HI?
CM 6 kan hrawn chhung khan anmahni tawkah thawk tha theuh mah se, 6 basic needs kalpuitu Brig. T. Sailo kha ram development puitling tak tak kalpui duhtu leh a taka tihhlawhtlin tumtu chu niin a lang. A bak zawng pawh hian an titha ve thawkhat a, mahse, hmabak an inchhunzawmsak duh lova ro hran rela kawng dang dap ringawta an khawsakna khan kan ram sawngnawina lu lian bur, taksa pum thang thei si lova kan awm mekna chhan hi a ni. Hei hi achhan ber pawh tuna kan CM-in a sawi fo thin angin “Sawrkar tichhetu chu rorel lai party mi leh sate tho an ni” a tih thin hi thudik tak a ni. Unit atanga party Headquarters thlenga party mi leh sa, abikin a fatu ni pha chinho hian anmahni hamthatna leh tanghma haina hlira tenawm taka anmahni ministry theuh an nawr buai mangan thin avangin, annin tlinleh loh an hlauh bawk si avangin an duh angin ke an pen thei thin lo a ni.
MLA pakhat bial fang ka zui tumin a bial chhunga veng tinte mamawh theuh phuhruk nan MLA Fund rualkhai takin a sem a. A tawpah block President & Secretary-in an duh ang thãlin an chawk danglam (manipulated) leh vek. A mangang chuan ka bulah-”En teh, hetiang hi a ni a, engmah hi thil tha a tih theih loh” a ti a, a sawisel ngam si lo. Tuna kan CM Pu Duha pawh hi Goa state tuifinriat kam tuaka khawsa Hippies leh gang rualho ûm bova tudawltu IPS Officer huaisen leh fel tak ni mah se, tunah chuan political party 6 tanghote thununna hnuaiah a awm avangin kalloh kutkawl (unlocked handcuff) bun reng ang maiin a duhdan, tum dan leh thlir dan pawhin a thuneihna pawh a hmang thei lo niin a lang.
Kum 2011 chhiarpuiah khan Mizoramah chhungkaw 221,077 kan awm a, tunah chuan chhungkaw nuai 2.5 vel chu kan ni tawh mahna! ZPM manifesto chapter III (a)-(f)-ah khan kkawlphetha tihchangtlunna tur hlir a awm. Tin, Mizoramin HEP 3663 MW siam chhuah theihna kan nei niin tarlan a ni a, chutih laiin kum 35 liam ta chhung khan kawlphetha kan siam chhuah chhun chu 29 MW vel lek a la ni a, a zahthlak rem rem hle mai! MW sangthum chuang siam chhuah theihna nei reng si a, kawlphetha indaihlohna avanga nitin eng kan nei ngun lutukte hi zah ahnekin mipui hmaa insawithiamah an tlak kumkhua ta zawk niin a lang. Mipui sawrkar pawh hi a insawi loh dan hlira a khawsak tak avangin kawlphetha kan intodelh phah dawn chuang lo niin a lang. Thil tha hmu reng si a, ti duh chuang si lote hian viksit bharat 2047 pawh lo thleng ila state dangte hnunga kâwl êk thai bak hmabak kan nei chuang lovang.
BIHAR CM VE THUNG?
Kum 1946-2025 kum 79 chhung khan Bihar hian Chief Ministers 23 a nei tawh a, Tuna incumbent Nitish Kumar hi February 22, 2015 atang khan CM a ni tawh a, Bihar Chief Minister incumbent ni rei ber a ni mek.
Tichuan, 17/07/2025 khan Bihar Chief Minister Nitish Kumar chuan state chhunga assembly inthlanpui neih a nih hma thla khat la awmah kawlphetha unit 125 a thlawna an chhit tur thu mipuite a hriattir a, CM Nitish Kumar chuan a sawrkar tirh khan mi zawng zawng hnenah electric kan pe vek tawh a, a man tlawm takin kan pe chhuak tawh a ni. Tunah chuan, 1 August 2025 a?ang khian July thlaa bill telin state chhunga consumer zawng zawngte chuan electric unit 125 thleng man an pek a ngai tawh dawn lo tih kan rel ta a ni,” tiin Nitish chuan a social media X-ah post a ni. “He thu puan hi NDA chuan “historic” tiin an fak a, NDA chu ‘double-engine Sawrkar’ tiin an fak hle. Deputy Chief Minister Samrat Chaudhary chuan he thu puan hi “unit 125 aia tlem hmangte tan chuan ni “vanneihna ni” tiin a sawi. “Bihar CM Nitish Kumar chuan unit 125 thleng a thlawna electric pek a nih tur thu a puang a ni. Hei hian state chhunga chhungkaw vaibelchhe 1.67 zetin an hlawkpui dawn a ni. Unit 125 aia tlem hmangtute tan chuan hmakhuaw ên ni a ni,” tiin Chaudhary chuan a sawi. Hei bakah hian Bihar State sorkar chuan kum thum chhungin inchung (rooftop) tinah solar power panel a dah dawn tih a tiam bawk. CM Nitish-a thupuan hi Bihara chhungkaw vbc 1.67-te tan chuan a van tangkai dawn tehlul êm! Mite chuan an ram hi a takin an hmangaih takzet a ni.
A TLÂNGKAWMNA
Mizoram State tereuh tê, mihring nuai 12 awrh, chhungkaw nuai 2.5 vel, MLA pawh 40 chauh nei ram zimte hi kan ram hruaitute hian an enkawl hlei thei lo chu a ni ber a, ngaihtuah chian chuan thil awiawm lo leh zahthlak tak a ni. Bihar state chhungkaw vbc 1.67-te êng chhit unit 125 theuh man tam turu-tara dan tur hi chhut mah teh? Keini ve erawh a thlawna chhit chu teuh lo mai; a teuh lo mai! Kumtin êng chhit man a pung tual tual a, man chawia êng chhit tur pawh kan hmu zo lova chha chu a ni a, Bihar nen chuan kan inthlau vet vet hle mai? Bihar-ah hian in vbc 1.01 awmin 36.76% chu cement in a ni a, kum 3 chhungin heng in chungtin rooftop-ah hian Nitish-a sawrkar chuan êng (solar) dahsak vek a la tumzui bawk. Chhungtina NLUP Rs 100,000/- theuh sem tiam te, SEDP Rs 300,000 theuh sem tiamte leh bana kaih policy, kai thaleh thei si lote ai chuan Bihar CM hmalakna hi a lianthamin a ropui takzet zawk a ni. Bihar-ah hian caste survey 2023-in a tarlan danin mi 130.7 million an awm a, hetiang zozai hi Nitish Kumar hian hneh takin a enkawl thei niin a lang a, kan ram zimtê hi enkawl phei se’ng chuan a hnehsawh rem rem ngawt ang. Chuvangin, CM theuh theuh an inang lo hlawm hle a ni e.