Aizawl: Mizoram Legislative Assembly member Lalrintluanga Sailo chuan kum 65 mi niin, July 21, 2025 (Thawhtanni) zan dar 9 vel khan Max Super Speciality Hospital, New Delhi-ah a thi.
Dampa bialtu MLA Lalrintluanga Sailo hi khawsik vangin June 29, 2025 khan Delhi panpui a ni a. Max Super Speciality Hospital-ah hian ni khat ward-a a awm hnuah ICU-ah dah luh a ni a, hun rei tak a damloh hnuah Thawhtanni zan dar 9 khan a thi a ni.
Thawhtanni zan khan Lalrintluanga Sailo ruang hi Delhi Mizo Welfare-in an buaipui a. A awmna Max Hospital-ah tih tur tulte tihfel a nih hnuah AIIMS ah thlawhnaa phurh turin a ruang hi sawngbawl a ni. Thawhlehni chawhma dar 10:30 a Delhi atangin Indigo flight-in Lengpui panpui niin, nimin chhun dar 1:20 khan Aizawl thlenpui a ni a. MLA eng emaw zatin an lo hmuak.
Lalrintluanga Sailo ruang hi nizan khan an chenna Luangmualah lumen a ni a, vawiin chhun dar 12-ah Luangmual Presbyterian Kohhran Centenary Hall ah vui tura ruahman a ni.
Dampa bialtu MLA ruang hi Delhi Mizoram House hotute leh Delhi Mizo Welfare-in thil tul hrang hrang an buaipui bakah, Delhi-a cham mek Assembly Speaker Lalbiakzama; Home Minister K. Sapdanga; Rajya Sabha MP K. Vanlalvena; Lok Sabha MP Richard Lalhmangaiha; Serlui bialtu MLA Lalrinsanga Ralte leh BJP Mizoram State Vice President JB Rualchhinga ten a hmunah an thutchilh a ni.
Aizawla piang leh sei lian, Dampa bialtu MLA hi kum 1975 khan Ch Chhunga High School, Chawlhhmun atangin pawl riat a zo a; 1976 khan, kum 16 a nihin India lak atanga zalenna sualtu MNF zawmin hnam sipaiah a tang a, Captain Thangrehlova a zui nasa a. MNF leh India an inrem thleng, kum 10 chhung ram hnuai sipaiah a tang.
Kum 2008 khan a vawi khat nan MNF ticket-in MLA inthlanpuiah a ding a, Dampa bialah Congress candidate Lalrobiaka a hneh lo.
Kum 2013 MLA inthlan dawnah MNF ricket bawka ding tura a inngaih hnuah, din tir a ni leh lo.
Kum 2018 khan a vawi khat nan MLA inthlanah a tling a, kum 10 kaltaa a hneh loh Lalrobiaka lakah vote 1,600 chuanga chakin, MNF ticket-a Dampa bial atanga tling hmasa ber a ni a, kum 2018-2023 chhung MNF sorkarah deputy chief whip nihna a chelh.
Kum 2023 MLA inthlanah a bial ngaiah ding lehin a tling nawn leh a ni.
Kum 1990 atanga 2002 thleng Luangmual Village Council President a nih hnuah, Branch YMA President leh Finance Secretary a ni zui leh a, Mizoram Football Association-ah term hnih chhung executive member a ni tawh bawk.
May 9, 1986 khan Lalbiakthuami nen inneiin fa panga, mipa pathum leh hmeichhia pahnih an nei a ni.