Indian Vice President Jagdeep Dhankhar-a chu Thawhtanni zan khan a bâng a, a thlaktu tur inrinsiakna pawh a awm nghal.
BJP kaihhruai NDA chu a thlang thei tur member ngah zawk an ni a, Dhankhar-a bâng hian mi tam tak a barakhaih a, a aiawhtu tur hi tihfel thuai pawh a nih a rinawm.
Governor lo ni tawh thin te, an pawla hruaitu lawk lo ni tawh thin te, union minister pawh lo ni tawh thin thlengin BJP hian vice president thutthlenga thuttir tura vawrh chhuah tur an ngah nia ngaih a ni a. Dhankhar-a pawh hi tun hmain West Bengal governor a lo ni tawh thin.
Dhankhar-a’n a thlak tak, M Venkaiah Naidu-a kha BJP president thin niin Prime Minister Narendra Modi-a sorkarah khan cabinet-ah a tel thin a, kum 2017 khan an party chuan vice president tur hian an chhuah a ni.
“Thil buaipui tan mek chauh a la ni a, party hian mi tha, tuma hnial buai theih loh tur a thlang chhuak ang,” tiin BJP hruaitu pakhat chuan a sawi a. Vice president hi party hruaitu hlun, tawnhriat lo ngah tawhte chan a ni tlangpui niin a sawi bawk.
Hming sawi rik zingah Janata Dal (United) MP, Rajya Sabha Deputy Chairman Harivansh-a pawh a langsar pawl a ni a. Ani hi tuna a nihna hi kum 2020 atanga chelh tan kha niin sorkar rin pawh a hlawh viau.
Dhankhar-a hi vice president a nih chhungin Rajya Sabha-a eptu bengchheng tak takin an tibuai nasa hle a; mahse, a thil sawi dan fel fai tak, a bikin inhnialna lian awm kara a tawng chhuahte avangin ngaihzawn a hlawh hle thin a ni.
Thawhtanni zana a bânna a thehluhah Dhankhar-a hian a hrisel lohna thil vang niin a tar lang.
President Droupadi Murmu-i hnenah lehkha hi thehlutin chhan tha tak avanga bâng a nih thu a ziak.
“Hriselna enkawl ngaih pawimawh avang leh damdawi thiamte thurawn angin Vice President of India ka nihna atang hian Constitution Article 67(a) tlawhchhanin bânna ka thehlut a ni,” tiin president hnenah hian a ziak a ni.
Kum 74 mi, Dhankhar-a hi August, 2022 khan lak luh niin a hun hi kum 2027 thleng a la ni.
Vice president a nih angin Rajya Sabha-ah chairman a ni nghal a, parliament fur thutkhawm tan ni tlaiah a bâng a ni.