Aizawl: Education Minister Dr. Vanlalthlana, Commerce & Industries Minister F. Rodingliana, leh Rural Development & Administration Minister Prof. Lalnilawma te chuan Govt. Aizawl North College (GANC) leh a thenawm ram leh building tlawhin nimin zing khan an enfiah.
Tun dinhmunah hian GANC chuan zirlai an ngah avangin an thenawm hmar lama Commerce & Industries bazar hmun chu an luah then a. College hmunhma hian zirlai a dawl zawh tawh loh avangin harsatna an tawk chho mek a ni. Hemi ching fel tur hian July ni 16, 2025 khan joint meeting neih tawh a ni a. Thutlukna felfai zawk siam a nih theih nan meeting-in a lo rel tawh angin a hmun hi tlawh a ni.
GANC hmar lamah hian bazar atana hman, Commerce & Industries building awmin class lak nana hman then mek a ni a. Building ram hi college atana luah a nih chuan Ramhlun North bazar hmunhma tur ruahman a ngai dawn a. Bazar building thenawma sorkar building chu MINECO-a office building sa mek, Aizawl District Local Administration Office leh office hawn thar Aizawl North Revenue Office atana luah mek a ni a. Bazaar building nen a inkarah hian MIZOFED building a tla zep a ni.
Heng building chhak lam hi SCERT ram niin DIET Principal Quarters bakah staff quarter pakhat awmin, a thenawm chhim lamah PHE site office a awm a. Heng lai rama sorkar building awmte hman dan turah hian ruahmanna kalpui dan tur ngaihtuah mek a ni a. Ram leh building hi sorkar department hrang hrang hnuaia awm a nih avangin joint meeting hmanga hma lak zel dan tur sawi ho a ni.