MZP President H Lalthianghlima chuan July thla chhunga NHIDCL-in Mizoram ei leh bar lak luhna kawngpui pawimawh chhe zual lai an siam tha lo a nih chuan Aizawl-a an pisa kalhsak an tum thu a sawi a. NHIDCL executive director pawh Mizoramah lo let leh tawh lo tura an hriattir tawh thu a sawi.
Thawhlehni khan Aizawl Press Club-ah thu thar thehdarhtute kawmin H Lalthianghlima chuan MZP rorelna sang ber dawttu, Federal Council vawi 59-na chuan, ‘NHIDCL hnathawh hi a that tawk loh thin avangin a that zawk theih nan MZP-in hma la chhunzawm zel rawh se’ tia an thu rel bawhzuiin, July 17, 2025 khan NHIDCL Executive Director (ED) Virendra Jakhar sawipui tum ni mah se, chawlh a lo lak avangin an hmuh theih loh thu a sawi.
MZP president chuan Mizoram ei leh bar lak luhna kawngpui pawimawh em em, kal hleih theih loh khawpa a chhiat laia NHIDCL hotupa ber, ED-in August 7 thleng chawlh a la daih hi hriatthiam har an tih thu sawiin, “Mizo mipuite min hmuhsittu hi Mizorama awm tlakah MZP chuan a ngaih loh bakah a deputation term a tawp tawh avangin a term pawhsei a remti lo,” tiin, Mizoramah lo let leh tawh lo turin a hriattir nghal thu a sawi.
Mizoram ei leh bar lak luhna kawngpui pawimawh, a chhiat lutuk avanga kal hleih theih loh khawpa a chhiatna lai hi NHIDCL enkawl lai a nih thu sawiin MZP president chuan, “March 26, 2025 khan Mizoram PWD chuan Bilkhawthkir – Kolasib (Km 70-95) leh Kawnpui/Khamrang (Km 118-133) chu NHIDCL kutah a hlan a ni,” tiin, July thla chhung ngeia NHIDCL-in an enkawl kawngpui chhe zual lai lirthei kal theih tura thuam tha vat turin a phut tih a sawi.
H Lalthianghlima chuan NHIDCL hmalak dan uluk takin a vil dawn bakah, a tul angin a bawhzui zel dawn tih a sawi a. Hun tiam chhunga hmalakna lawmawm a awm loh chuan NHIDCL office an kal ngei dawn thu leh Jakhar hi Mizorama a rawn let leh a nih chuan a chungah engpawh thleng se an mawhphurhna a nih loh tur thu a sawi bawk.