Aizawl: Mizorama political party hrang hrangin Mizoram Legislative Assembly member Lalrintluanga Sailo, Dampa bialtu MLA thi ta an ui thu thuchhuah an siam.
MNF chuan an party National Core Committee Lalrintluanga Sailo chu an uiin an sun tih sawiin, “MNF ban pui rinawm chu a tliak ta,” an ti.
MNF chuan party tana rinawm, ram leh hnam tana thahnem ngai, a bial tana theih tawp chhuah mektu, hun lo taka an chan hi an ui tak zet tih sawiin, “Bible nema kum 16 mi lek a nih laia ram leh hnam tana a thisen far tawp thlenga inhlan, Pu Lalrintluanga Sailo chu a intiam ang ngeiin a thih ni thlengin ram leh hnam tan a nung ta a ni. A kalsan tak a nupui Pi Lalbiakthuami leh a tu leh fate Pathianin awmpui mawlh rawh se,” an ti.
ZPM General headquarters chuan ram tana an thawhpui, Dampa bialtu MLA Lalrintluanga Sailo in hun lo taka a borals ta mai hi pawi an tiin, an ui takzet a, ram mipuite tan pawh channa nasa takah an ngaih thu an sawi a. Ram tana rawng a lo bawl tawhna zawng zawngte hrerengin, an theihnghilh tawh dawn loh thu an sawi.
MPCC pawhin ram tana an thawhpui, Lalrintluanga Sailo MLA a boral chu pawi an tiin, an ui takzet tih an sawiin, “Pu Lalrintluanga hi pa tha tak, ram rawngbawlnaah pawh tih tak taka thil ti thin a ni. Mi thil phal, a bialte tana a tha ber duhtu a ni. A bialah pawh hun a hmang tamin a bial mipuite bakah Mizoram mipuite ngainat rawn a ni. Hetia a boralsan ta mai hi a bial mipuite kan tuarpui a, a hmunruak a zau dawn hle a ni,” tiin sulhnu ropui tak a hnutchhuah thu an sawi.
BJP Mizoram chuan Lalrintluanga Sailo, Dampa Constituency bialtuin mihringte ngaiha hun lo taka chatuan ram a pan ta chu pawh an tiin, an ui tih an sawi a. “Mizoramin hetiang MLA, mi tha tak kan chan ta mai hi a pawi kan tiin, MNF Party leh a chhungte kan tawrhpui takzet zet a ni,” an ti.
PC party pawhin veteran legislator, House chhung leh pawn a mi thahnemgai leh inpe zo tak mai ina a kalsan thut mai hi Mizoram leh hnam tan channa nasa a nih thu sawiin, an ui thu an tar lang bawk.